Фото Getty Images
2026 жылғы футболдан әлем чемпионатының ширек финалында Испания құрамасы Бельгияны 2:1 есебімен жеңіп, турнирдің жартылай финалына жолдама алды, деп хабарлайды "Адырна".
Испаниялықтар кездесудің 30-минутында есеп ашты. Фабиан Руис қақпашы қайтарған допқа бірінші жетіп, командасын алға шығарды.
Бельгия құрамасы бірінші тайм аяқталмай жатып таразы басын теңестірді. 41-минутта Шарль де Кетеларе қапталдан көтерілген пасты сәтті аяқтап, есепті 1:1-ге жеткізді.
Матч тағдыры ойынның соңғы минуттарында шешілді. 88-минутта қорғаушы Пау Кубарсидің алыстан тепкен добын бельгиялық қақпашы қайтара алғанымен, бірінші болып жеткен Микель Мерино допты қақпа торына тоғытып, Испанияға жеңіс сыйлады.
Осылайша кездесу 2:1 есебімен Испанияның пайдасына аяқталды.
Еске салсақ, испандықтар бұған дейін плей-офф кезеңінде Аустрияны 3:0 есебімен жеңіп, кейін Португалияны жарыс жолынан шығарған болатын. Ал Бельгия құрамасы Сенегалды жеңіп, кейін АҚШ құрамасын ірі есеппен ұтқан еді.
Жартылай финалда Испания құрамасы Франциямен кездеседі.
