Ұлытау облысының кең даласында 25 жастағы Мәди Әбілдинов өзінің алғашқы 50 гектар жерін өңдеумен айналысып жатыр. Ол ауыл шаруашылығын қолға алып, бала кездегі ермегін қалай кәсіпке айналдырған жайлы әңгімелеп берді.
Алғашқы қиындықтар мен шешімдер
Мәди үшін алғашқы кедергілер – жердің сапасы мен инфрақұрылымның жоғы болды.
«Мен бала кезден ауылда өстім. Әкем мал өсіретін, анам бау-бақшада жұмыс істейтін. Бірақ бізде жер алу қиын болатын. Енді жаңа жер саясаты арқасында біз өзімізге қажетті жерді ашық конкурс арқылы алдық», – дейді Мәди.
«Бірінші жылдары техника жеткіліксіз, суармалы жүйе жоқ жерлерде жұмыс істеу қиын болды. Бірақ мемлекеттен жеңілдетілген несие алып, техника сатып алдық. Енді топырақты өңдеп, дақыл егуді бастауға дайынбыз», – дейді жас фермер.
Кооперация – табыстың кілті
Мәди ауылдастарымен бірігіп, кооператив құрудың маңызды екенін атап өтті:
«Біз көрші ауылдардағы жастармен бірігіп, ортақ қойма мен техника аламыз. Бұл шығынды азайтып, өнімділікті арттырады. Бізге ең бастысы – бір-бірімізге қолдау көрсету».
Цифрландыру мен ашықтық – жаңа мүмкіндіктер
Мәди цифрландырудың тиімділігін ерекше атап өтті:
«Қазір барлық жер онлайн картада көрсетілген, қай жердің бос тұрғанын білеміз. Бұрын мұндай мүмкіндіктер жоқ еді, адамдар жерді заңсыз тартып алып, дау туындататын».
Жас фермердің жоспары – алдағы бес жылда жерін 200 гектарға дейін ұлғайтып, мал шаруашылығын қосып, ауылдағы өнімді нарыққа шығару.
«Жер бізге берілді, енді әрбір гектарының өнімді болуына өзіміз жауаптымыз. Бұл тек кәсіп емес, ауылды дамытуға үлесіміз», – дейді Мәди.
