دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) ايماقتىق ديرەكتورى حانس كليۋگە ۆۆس-گە بەرگەن سۇحباتىندا ەۋروپادا قىستا پاندەمياعا قارسى قوسىمشا شارالار قابىلدانباسا، 500 مىڭ ادام كوروناۆيرۋستىق ينفەكتسيادان قايتىس بولۋى مۇمكىن ەكەنىن ايتتى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، بەتپەردە رەجيمىن جاقسىراق ساقتاۋ جاعدايدى جاقسارتا الادى. سونىمەن قاتار، ەكپە ناۋقانىنىڭ قارقىنىن جەدەلدەتىپ، حالىقتىڭ دەنساۋلىعىن ساقتاۋدىڭ نەگىزگى شارالارىن ۇستانىپ، جاڭا ەمدەۋ ادىستەرىن ەنگىزۋ قاجەت.
كليۋگە مىندەتتى ۆاكتسيناتسيانى سوڭعى شارا رەتىندە قاراستىرۋ كەرەكتىگىن اتاپ ءوتتى.
- ەۋروپادا كوروناۆيرۋستىڭ تارالۋىنا سۋىق مەزگىل، ۆاكتسيناتسيانىڭ جەتكىلىكسىز بولۋى، سونداي-اق نەعۇرلىم جۇقپالى دەلتا شتاممىنىڭ باسىم بولۋى ىقپال ەتەدى - دەپ اتاپ ءوتتى كليۋگە.
ەستەرىڭىزگە سالا كەتەيىك، بۇعان دەيىن ول ەۋروپا حالقىنىڭ 95 پايىزى بەتپەردە كيەتىن بولسا، بۇل 188 مىڭ ادامنىڭ ءومىرىن ساقتاپ قالۋى مۇمكىن ەكەنىن حابارلادى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، 21 قاراشاداعى جاعداي بويىنشا ەۋروپادا كوروناۆيرۋستىق پاندەميا باستالعاننان بەرى 82,69 ميلليون ادامنان COVID-19 اۋرۋى تىركەلدى. 1-7 قاراشا ارالىعىنداعى اپتا سايىنعى ءوسۋ پاندەميانىڭ بۇكىل ۋاقىتىنداعى ەڭ جوعارى كورسەتكىش بولدى - 201,8 مىڭ جاعداي.
"ادىرنا" ۇلتتىق پورتالى
