ازەربايجان رەسپۋبليكاسىنىڭ ميللي ءماجىلىسى دەپۋتاتىنىڭ رەسەي فەدەراتسياسى اۋماعىنا كىرە الماۋى تۋرالى سۇراققا ءازىربايجان سىرتقى ىستەر مينيسترلىگىنىڭ ءباسپاسوز حاتشىسى ايحان گادجيزادە جاۋاپ بەردى، دەپ حابارلايدى "ادىرنا" ۇلتتىق پورتالى.
Caliber.Az اقپارات اگەنتتىگىنىڭ ءسىم-گە سىلتەمە جاساي وتىرىپ حابارلاۋىنشا، ۆەدومستۆو بۇل وقيعانىڭ بولعانىن راستادى.
«ءيا، مۇنداي جاعداي بۇگىن راسىمەن ورىن الدى. ايتا كەتەيىك، ميللي ءماجىلىس دەپۋتاتى ازەر باداموۆ كىرەتىن دەلەگاتسيانىڭ استراحان قالاسىنا ساپارى رەسەي فەدەراتسياسىنىڭ استراحان وبلىسى گۋبەرناتورىنىڭ ورىنباسارى – ۇكىمەت توراعاسى دەنيس افاناسەۆتىڭ ارنايى شاقىرۋىمەن ۇيىمداستىرىلعان بولاتىن. ساپاردىڭ ماقساتى – ءازىربايجان حالقىنىڭ جالپىۇلتتىق كوشباسشىسى گەيدار اليەۆتىڭ تۋعانىنا 102 جىل تولۋىنا ارنالعان ءىس-شارالارعا قاتىسۋ ەدى. دەلەگاتسيا باكۋدەن ماسكەۋگە ۇشىپ كەلگەنىمەن، رەسەيلىك تاراپ الدىن الا ەش ەسكەرتۋسىز نەمەسە اقپارات بەرمەستەن دەلەگاتسيا قۇرامىنداعى دەپۋتات ازەر باداموۆتى ماسكەۋ اۋەجايىندا ۇستاپ، وعان ەلگە كىرۋگە تىيىم سالىنعانىن مالىمدەدى. ءبىراز ۋاقىت اۋەجايدا ۇستالعاننان كەيىن، ول ەلگە قايتارىلدى»، – دەدى ازەربايجان ءسىم وكىلى.
گادجيزادەنىڭ ايتۋىنشا، بۇل وقيعاعا بايلانىستى رەسەيدىڭ سىرتقى ىستەر مينيسترلىگىمەن ازەربايجاننىڭ رەسەيدەگى ەلشىلىگى ارقىلى دەرەۋ بايلانىس ورناتىلعان. رەسەي ءسىم-ءنىڭ رەسمي وكىلى بۇل ماسەلە زەرتتەلەتىنىن ايتقانىمەن، مۇنداي شەشىمنىڭ ناقتى سەبەبى جايلى تۇسىنىكتەمە بەرمەگەن.
«رەسەي تاراپىنان مۇنداي ارەكەتتى دوستىققا جاتپايتىن قادام دەپ سانايمىز جانە بۇل ماسەلەگە قاتىستى تۇسىنىكتەمە بەرۋدى كۇتەمىز»، – دەدى ازەربايجان ءسىم-ءنىڭ ءباسپاسوز حاتشىسى.
