بۇگىن، كورنەكتى جازۋشى، پۋبليتسيست، اۋدارماشى، سىنشى جانە جۋرناليست عابباس قابىشۇلى 90 جاسقا تولدى.
ول 1935 جىلى شىعىس قازاقستان وبلىسى، ۇلان اۋدانى، ۇرانقاي اۋىلىندا دۇنيەگە كەلگەن.
عابباس قابىشۇلى ەڭبەك جولىن 1955 جىلى وبلىستىق «التاي بولشەۆيگى» (قازىرگى «ديدار») گازەتىندە كوررەكتور، ءبولىم مەڭگەرۋشىسى، جاۋاپتى حاتشى قىزمەتتەرىن اتقارۋدان باستادى. 1966 جىلى رەسپۋبليكالىق «قازاق ادەبيەتى» گازەتىنە اۋىسىپ، جاۋاپتى حاتشىنىڭ ورىنباسارى، كوركەم ادەبيەت جانە ادەبي سىن بولىمدەرىنىڭ مەڭگەرۋشىسى بولىپ قىزمەت ەتتى.
1974 جىلدان كسرو ادەبي قورى قازاق فيليالىنىڭ ديرەكتورى، 1983 جىلى رەسپۋبليكالىق «ارا-شمەل» ساتيرا جۋرنالىنىڭ باس رەداكتورى، 1994–1996 جىلدارى قازاقستان جازۋشىلار وداعى باسقارماسىنىڭ ەكىنشى حاتشىسى قىزمەتتەرىن اتقارعان.
ءازىل-سىقاق اڭگىمەلەر، نوۆەللالار، سىن، كوركەم وچەرك، كوسەمسوز، ءتۇرلى تاقىرىپقا ماقالا جازعان جازۋشىنىڭ ساتيرالىق كورىنىستەرى «قىمىزحانا»، «تاماشا» تەاترلارىندا ساحنالانعان.
عابباس قابىشۇلىنىڭ وتكىر ءتىلى مەن قوعامدىق-الەۋمەتتىك ماسەلەلەرگە قاتىستى سىنشىل كوزقاراسىن 2011 جىلى جازىلعان، پرەزيدەنت سايلاۋىنا دايىندىق كەزەڭىن بەينەلەيتىن "كانديداتتىڭ اتى - كانديدات" ساتيرالىق اڭگىمەسىنەن دە اڭعارۋعا بولادى.
"بىتپەيتىن كەزەكتى مەرزىمدەرىنىڭ كەلەسىسىنىڭ بىتۋىنە ءالى ءبىر جىلى بولسا دا، باياعىدان بەرگى پرەزيدەنتىمىزدىڭ قايدا، نەگە اسىققانىن يي... كىم ءبىلسىن، ايتەۋىر، مەرزىمىنەن ءبىر جىل بۇرىن قايتا سايلانۋى قاجەتتىگىن ەتىككە قايىڭ شەگە قاققانداي ەتىپ ايتتى", – دەپ، بيلىك باسىنداعى تۇلعالاردىڭ اسىعىستىعى مەن زاڭدى ءوز ىڭعايىنا يكەمدەيتىن ادەتىن ءاجۋالايدى.
سونداي-اق، جازۋشى حالىقتىڭ مىنەز-قۇلقىن، سايلاۋ پروتسەسىندەگى فورماليزم مەن ءپوپۋليزمدى اشىق سىنايدى.
