قوعامدىق-ساياسي باعىتتاعى «ۆرەميا» گازەتىنىڭ باس رەداكتورى، قازاقستاندىق جۋرناليست 58 جاسىندا لەۆ تاراكوۆ ومىردەن ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى مادەنيەت جانە اقپارات ءمينيسترى ايدا بالاەۆا facebook پاراقشاسىندا جازدى.
"لەۆ يۋرەۆيچ – كورنەكتى مەديامەنەدجەر، شىعارماشىل جان، تالانتتى تۇلعا جانە تاماشا پۋبليتسيست ەدى.
كوپ جىلدار بويى ونى جەكە تانىپ، قىزمەتتىك ماسەلەلەردە بىرلەسە جۇمىس ىستەپ، جىلى قارىم-قاتىناستا بولعانىما قۇرمەتپەن قارايمىن. بۇگىن تاۋەلسىز قازاقستان جۋرناليستيكاسىنىڭ كوگىندە تاعى ءبىر جارىق جۇلدىز ءسوندى. مارقۇمنىڭ تۋعان-تۋىستارى مەن جاقىندارىنا قايعىرىپ كوڭىل ايتامىن. قايعىلارىڭىزعا ورتاقپىن" - دەپ جازدى ول.
لەۆ تاراكوۆ – جۋرناليستيكا اۋلەتىنەن شىققان تۇلعا. كيەۆتەگى جوعارى اسكەري-تەڭىز ساياسي ۋچيليششەسىن تامامداعان. ەڭبەك جولىن سولتۇستىك فلوتتا وفيتسەر بولىپ باستاعان. ءار جىلدارى ول قازاقستاننىڭ ءباسپاسوز جانە بۇقارالىق اقپارات قۇرالدارى مينيسترلىگىندە، پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىندا باسشىلىق قىزمەتتەر اتقارعان، سونداي-اق «يزۆەستيا-كازاحستان» گازەتىنىڭ باس رەداكتورى بولعان.
