اقش سەناتىنىڭ 50 مۇشەسىنەن قۇرالعان توپ رەسەي ۋكرايناداعى بەيبىت كەلىسىمنەن باس تارتقان جاعدايدا، وعان قارسى جاڭا سانكتسيالار ەنگىزۋدى كوزدەيتىن زاڭ جوباسىن ۇسىندى، ەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
بۇل تۋرالى 1 ءساۋىر كۇنى، رەسپۋبليكالىق سەناتور ليندسي گرەم مەن دەموكرات سەناتور ريچارد بليۋمەنتالدىڭ سايتتارىندا جاريالانعان ءباسپاسوز حابارلاماسىندا ايتىلعان.
"بۇل سانكتسيالار رەسەي ۋكراينامەن تۇراقتى بەيبىتشىلىك ورناتۋ تۋرالى ادال كەلىسسوزدەر جۇرگىزۋدەن باس تارتسا نەمەسە بەيبىت كەلىسىم جاسالعاننان كەيىن ۋكراينا ەگەمەندىگىنە قاۋىپ توندىرەتىن اسكەري باسقىنشىلىق سياقتى وزگە دە ارەكەتتەرگە بارسا ەنگىزىلەدى. سونداي-اق، زاڭ جوباسى رەسەيدىڭ مۇنايىن، گازىن، ۋرانىن جانە باسقا دا ونىمدەرىن ساتىپ الاتىن ەلدەردەن يمپورتتالاتىن تاۋارلارعا 500% مولشەرىندە باج سالىعىن ەنگىزۋدى كوزدەيدى", – دەلىنگەن حابارلامادا.
"سەناتتا رەسەي – باسقىنشى مەملەكەت دەگەن كوزقاراس باسىم. بۇل سۇمدىق سوعىستى جانە ءپۋتيننىڭ اگرەسسياسىن ءدال قازىر توقتاتۋ قاجەت. سونىمەن قاتار، بولاشاقتا دا مۇنداي ارەكەتتەرگە جول بەرمەۋ كەرەك. ءبىز رەسەيمەن بەيبىتشىلىك ورناتۋ ماسەلەسىندە پرەزيدەنت ترامپتىڭ كوڭىلى قالعانىن تۇسىنەمىز جانە ونىڭ تۇراقتى، ءادىل ءارى لايىقتى بەيبىتشىلىك ورناتۋ جونىندەگى ۇمتىلىسىن قولدايمىز" – دەپ مالىمدەدى گرەم مەن بليۋمەنتال.
"2025 جىلى پرەزيدەنت ترامپ پەن ونىڭ كومانداسى بۇكىل الەمنىڭ قولىنان كەلمەگەن نارسەنى ىسكە اسىرىپ، رەسەيدىڭ ۋكرايناعا قارسى اگرەسسياسىن تۇبەگەيلى توقتاتادى جانە ەركىن، دەموكراتيالىق ۋكراينانىڭ ومىرشەڭدىگىن قامتاماسىز ەتەدى دەپ ۇمىتتەنەمىز", – دەپ تۇيىندەدى سەناتورلار.
قۇجاتقا سايكەس، بۇل زاڭ جوباسىنىڭ اۆتورلارى – 25 رەسپۋبليكاشىل، 24 دەموكرات جانە ءبىر تاۋەلسىز سەناتور. سونىمەن قاتار، زاڭ جوباسىن وكىلدەر پالاتاسىنا ەنگىزۋگە ءتورت كونگرەسسمەن (ەكى رەسپۋبليكاشىل جانە ەكى دەموكرات) كەلىسكەن.
گرەم مەن بليۋمەنتال جاڭا سانكتسيالاردى اقش كونگرەسىنىڭ قوس پالاتاسى قولدايتىنىنا سەنىمدى. بۇل سانكتسيالار دايىن جانە سەنات پەن وكىلدەر پالاتاسىندا ەكى پارتيانىڭ دا باسىم قولداۋىنا يە بولدى.
بۇعان دەيىن گرەم مەن بليۋمەنتال رەسەيگە قاتىستى بىرنەشە بىرلەسكەن زاڭ جوباسىن ۇسىنعان. 2022 جىلعى قىركۇيەكتە جانە 2024 جىلعى ماۋسىمدا ولار رەسەيدى تەرروريزمدى دەمەۋشى مەملەكەت دەپ تانۋدى ۇسىندى. ال 2025 جىلعى ناۋرىزدا ولار رەسەيدىڭ 300 ميلليارد دوللاردان استام مۇزداتىلعان اكتيۆتەرىن تاركىلەپ، ۋكراينانىڭ پايداسىنا بەرۋدى تالاپ ەتتى. الايدا بۇل باستامالاردىڭ ەشقايسىسى قابىلدانبادى.
