ماسكەۋ ورتالىعىندا، لۋبيانكاداعى فەدەرالدىق قاۋىپسىزدىك قىزمەتى عيماراتىنىڭ ماڭىندا رەسەي پرەزيدەنتى ۆلاديمير پۋتينگە تيەسىلى بولۋى مۇمكىن ليمۋزيندەردىڭ ءبىرى جارىلىپ، ورتەندى. بۇل تۋرالى سەربيالىق «كۋرەر»، بريتاندىق Sun جانە نەمىستىڭ Bild باسىلىمدارى جازدى، جەپ حابارلايدى “ادىرنا” ۇلتتىق پورتالى.
«Aurus Senat» ماركالى ارنايى اۆتوكولىكتىڭ (قۇنى شامامەن 330 000 ەۋرو) قوزعالتقىش بولىگىنەن شىققان ءورت سالونعا تاراعان. جاريالانعان كادرلاردا جاقىن ماڭداعى مەيرامحانالار مەن بارلاردىڭ قىزمەتكەرلەرى كوشەگە جۇگىرىپ شىعىپ، ءورت سوندىرۋشىلەر كەلگەنگە دەيىن جالىندى وشىرۋگە تىرىسقانى كورىنەدى. جانىپ جاتقان كولىكتىڭ الدىڭعى بولىگىنەن قويۋ قارا ءتۇتىن شىققان.
باسىلىمداردىڭ مالىمەتىنشە، ليمۋزين رەسەي پرەزيدەنتىنىڭ اكتيۆتەرىن باسقارۋ جونىندەگى ۆەدومستۆوعا تيەسىلى. قازىرگى ۋاقىتتا كولىكتە بىرەۋدىڭ بولعان-بولماعانى بەلگىسىز، ال رەسەي بيلىگى بۇل وقيعاعا قاتىستى رەسمي مالىمدەمە جاساعان جوق.
Sun باسىلىمىنىڭ حابارلاۋىنشا، جۋىردا رەسەي پرەزيدەنتى مۋرمانسكىگە بارعان كەزدە تۇسىرىلگەن ۆيدەودا فەدەرالدىق كۇزەت قىزمەتىنىڭ (فقق) وفيتسەرى قۇرمەتتى قاراۋىلداعى ءاربىر اسكەري قىزمەتكەردى مۇقيات تەكسەرىپ، جاسىرىن قارۋ نەمەسە جارىلعىش زاتتاردىڭ بار-جوعىن انىقتاعان. تەكسەرىس اياقتالعاننان كەيىن عانا پۋتين بەلگىسىز ساربازدىڭ قابىرىنە گۇل شوعىن قويۋ ءراسىمىن وتكىزگەن. گازەتتىڭ مالىمەتىنشە، قۇرمەتتى قاراۋىلعا پاترونى جوق مىلتىقتار بەرىلگەن.
