كەنشىلەر مەن جۇمىس بەرۋشى اراسىندا ارا-تۇرا داۋ شىعىپ تۇراتىن «قازاقمىس» رۋدنيكتەرىندە اپات ورىستەپ جاتىر. «قازاقمىسقا» قاراستى كەنىشتەردە بۇعان دەيىن بولعان اپاتتار نەنى بىلدىرەدى؟
قازاقستانداعى ەڭ ءىرى تاۋ-كەن ءوندىرىسىنىڭ ءبىرى – "قازاقمىس" كورپوراتسياسى ەل ەكونوميكاسىندا ماڭىزدى ءرول اتقارىپ كەلەدى. الايدا بۇل ءوندىرىس ورنىندا بىرنەشە جىلدان اپاتتار مەن قايعىلى وقيعالار ورىن الىپ جاتىر. 30 جىلدان بەرى كورپوراتسيانىڭ شاحتالارىندا جانە مىس قورىتۋ زاۋىتتارىندا ادامدار قازا تاۋىپ، جاراقات العان.
ءبىر اپتا بۇرىن ۇلىتاۋ وبلىسىنىڭ جاڭاارقا اۋدانىندا ورنالاسقان «جومارت» كەن ورنىندا تاۋ جىنىسى وپىرىلىپ ءتۇسىپ، جەتى كەنشى قازا تاپقان. سوڭىنان وسى كەندى باسقارىپ وتىرعان «قازاقمىس» كومپانياسى ادام ولىمىنە قۇلاعان تاۋ جىنىستارىنىڭ سەبەپ بولماعانىن مالىمدەگەن. رەسمي اقپاراتقا قاراعاندا، قۇتقارۋشى بريگادا تاۋ جىنىستارىنىڭ قۇلاۋى تۋرالى ەشقانداي ايعاق تاپپاعان. «قازاقمىس» وسىلاي اقتالىپ جۇرگەندە، ءوندىرىستى قاۋىپسىزدىك شارالارىمەن قامتاماسىز ەتۋ ماسەلەسى دە وزەكتى بولىپ قالا بەرمەك. بۇعان دەيىنگى قايعىلى وقيعالار قازىردەن جاڭا شارالار قابىلداۋعا سەبەپ بولسا كەرەك ەدى. بۇرىنعى اپاتتارعا شولۋ جاساپ كوردىك.
1995 جىل
«قازاقمىس» كورپوراتسياسى 1992 جىلى قۇرىلعان. باق-تا جاريالانعان دەرەكتەرگە سۇيەنسەك، 1995 جىلى كورپوراتسيادا 19 ادام جۇمىس ۋاقىتىندا ءىس باسىندا قازا تاپقان.
2006 جىل
2006 جىلى 27 جەلتوقساندا قاراعاندى وبلىسىنىڭ ساتباەۆ قالاسىندا ورنالاسقان «قازاقمىس» كورپوراتسياسىنىڭ № 65 شاحتاسىندا ورىن العان وندىرىستىك اپات سالدارىنان 1957 جىلى تۋعان اۋىسىم شەبەرى كرۋگلياكوۆ كوز جۇمدى. توتەنشە جاعدايلار مينيسترلىگىنىڭ مالىمەتىنشە، وقيعا جەلتوقساننىڭ سارسەنبى كۇنى تاڭعى 3:40 شاماسىندا بولعان. الدىن الا دەرەكتەر بويىنشا، دوزاتور قۇلاپ كەتىپ، جۇمىسشى اۋىر جاراقاتتان وقيعا ورنىندا قايتىس بولعان.
2010 جىل
20 ماۋسىم كۇنى قاراعاندى وبلىسىنداعى "ستەپنوي" شاحتاسىندا جوندەۋ جۇمىستارى كەزىندە جارىلىس بولىپ، 23, 28 جانە 37 جاستاعى ءۇش جۇمىسشى قازا تاپتى. تاعى ءبىر جۇمىسشى تەرميالىق كۇيىك العان. اپاتتىڭ سەبەبى قاۋىپسىزدىك تەحنيكاسىنىڭ بۇزىلۋى دەپ جاريالاندى.
2013 جىل
بۇل جىلى «قازاقمىس» كومپانياسىندا ءۇش اپات ورىن الىپ، ءۇش ادام قازا تاپقان.
3 ماۋسىمدا "ستەپنوي" شاحتاسىندا تاۋ جىنىستارىن ءتۇسىرۋ كەزىندە جەر استى وزدىگىنەن جۇرەتىن ماشينا شاحتانىڭ جىراسىنا ءتۇسىپ، ماشينيست قازا تاپتى.
28 قىركۇيەكتە وڭتۇستىك-جەزقازعان شاحتاسىندا تاۋ جىنىسىنىڭ ءۇزىلىپ ءتۇسىپ، وزدىگىنەن جۇرەتىن جۇك كولىگىنىڭ ۇستىنە قۇلاۋى سالدارىنان جۇرگىزۋشى قازا تاپتى.
ال 2 قازان كۇنى جەزقازعان مىس قورىتۋ زاۋىتىندا جابدىقتاردى تازالاۋ كەزىندە بيىكتىكتەن قۇلاپ، ءبىر قىزمەتكەر قازا تاپتى.
2014 جىل
2014 جىلى «قازاقمىس» كورپوراتسياسىنىڭ كەنىشتەرى مەن ءوندىرىس وشاقتارىندا بىرنەشە قايعىلى وقيعا تىركەلدى.
قاڭتار ايىندا كورپوراتسياعا قاراستى «جومارت» شاحتاسىندا جۇمىسشى وزدىگىنەن جۇرەتىن كولىكپەن سوقتىعىسىپ، مەرت بولدى.
7 اقپاندا تاعى ءبىر شاحتەر قازا تاپتى. بۇل وقيعا دا جۇمىسشىلاردىڭ ەڭبەك جاعدايىن جاقسارتۋ قاجەتتىگىن ايقىنداي ءتۇستى.
21 ناۋرىزدا قارساقباي مىس قورىتۋ زاۋىتىندا جۇمىسشى وندىرىستىك جاراقات سالدارىنان كوز جۇمدى.
كۇز ايىندا قاراعاندى وبلىسىندا ورنالاسقان ءبىر كەنىشتە مينا جارىلىسى سالدارىنان تاعى ءبىر جۇمىسشىنىڭ ءومىرى قيىلدى. جارىلىس سەبەپتەرى مەن جۇمىسشىلاردىڭ قاۋىپسىزدىك دەڭگەيىنە قاتىستى سۇراقتار قوعامدا الاڭداۋشىلىق تۋعىزدى.
2015 جىل
2015 جىلدىڭ 16 قىركۇيەگىندە «قازاقمىس» كورپوراتسياسىنا قاراستى «ەنەرگوسەتي» كاسىپورنىندا وندىرىستىك اپات ورىن الدى. جوندەۋ جۇمىستارى كەزىندە اۆتوكراننىڭ جەبەسى قۇلاپ، سالدارىنان سلەسار ەر ادام اۋىر جاراقات الىپ، وقيعا ورنىندا قازا تاپتى.
2016 جىل
2016 جىلى «قازاقمىس» كورپوراتسياسىندا ورىن العان قايعىلى وقيعالار: سەبەپتەرى مەن سالدارى
9 ماۋسىمدا كران ءماشينيسى اۋىر كۇيىك الىپ، 10 كۇننەن كەيىن اۋرۋحانادا قايتىس بولدى. وقيعانىڭ ناقتى سەبەپتەرى تۋرالى اقپارات تارالمادى.
9 شىلدە كۇنى «جومارت» كەنىشىندە 42 جاستاعى شاحتەر سۋعا باتىپ كەتتى.
ال 28 شىلدەدە جەزقازعان بايىتۋ فابريكاسىنىڭ اۋماعىندا دانەكەرلەۋشى ءولى كۇيىندە تابىلدى. اپات سەبەبى تۋرالى اقپارات تارامادى.
2017 جىل
بۇل جىل دا «قازاقمىس» ءۇشىن قايعىلى جىل بولدى. قوعام كومپانيانىڭ وندىرىستىك قاۋىپسىزدىك ماسەلەلەرىنە قايتا كۇدىكپەن قارادى.
31 ناۋرىز كۇنى تاۋ-كەن جۇمىسشىسى شترەكتىڭ بىرىندە ەس-ءتۇسسىز كۇيىندە تابىلدى. الدىن الا مالىمەتتەر بويىنشا، بۇل جاعدايدىڭ سەبەبى جۇمىسشىنىڭ دەنساۋلىق جاعدايىنا بايلانىستى بولۋى مۇمكىن.
2017 جىلدىڭ 26 قىركۇيەگىندە سول كەنىشتە تاعى ءبىر قايعىلى وقيعا تىركەلدى. جۇمىسشىنى توك سوعىپ، ول وقيعا ورنىندا قازا بولدى. بۇل جاعدايدىڭ الدىن الا سەبەبى رەتىندە ەلەكتر جابدىقتارىمەن جۇمىس ىستەۋ كەزىندە قاۋىپسىزدىك ەرەجەلەرىنىڭ ساقتالماۋى دەپ قاراستىرىلدى.
2018 جىل
2018 جىلدىڭ 31 جەلتوقسانىندا شىعىس جەزقازعان كەنىشىندە 35 جاستاعى ماشينيست تاۋ جىنىسىنىڭ وپىرىلۋى سالدارىنان كوز جۇمدى.
2019 جىل
2019 جىلى وڭتۇستىك جەزقازعان كەنىشىندە ورىن العان ءۇش قايعىلى وقيعا وندىرىستىك قاۋىپسىزدىك ماسەلەلەرىن قايتا كوتەردى.
2019 جىلى 19 شىلدەدە 28 جاستاعى كەنشى جۇمىس بارىسىندا مەرت بولدى. وقيعانىڭ ناقتى سەبەپتەرى تۋرالى اشىق اقپارات جوق، الايدا وندىرىستىك اپات رەتىندە تىركەلگەنى بەلگىلى.
28 قاراشا كۇنى وڭتۇستىك جەزقازعان كەنىشىندە جارىلىس سالدارىنان شەبەر قازا تاپتى.
25 جەلتوقساندا №45 شاحتادا 1973 جىلى تۋعان ەلەكتر دانەكەرلەۋشىسى تاۋ-كەن-شاحتالىق كولىگىنىڭ استىندا قالىپ، اۋىر جاراقاتتان قايتىس بولدى. وقيعا 235-شاحتاداعى №1 شترەكت ءوندىرىس ورنىندا ورىن العان. تەرگەۋ ورگاندارى جۇرگىزۋشىنىڭ جۇمىسشىنى قالاي بايقاماي قالعانىن انىقتاۋدا
2020 جىل
2020 جىلى «قازاقمىس» كاسىپورنى 9 قىزمەتكەرىنەن ايىرىلدى.الايدا اپاتتار تۋرالى تولىق اقپارات باق بەتىندە جاريالانباعان.
سول جىلى 13 قاڭتاردا جەزقازعان قالاسىنداعى "ستەپنوي" شاحتاسىندا تاۋ جىنىسىنىڭ وپىرىلۋى سالدارىنان ءبىر كەنشى قازا تاپتى.
2020 جىلعى 10 ماۋسىم كۇنى قاراعاندى وبلىسىنداعى "ساتباەۆ" شاحتاسىندا مەتان گازىنىڭ جارىلىسى ناتيجەسىندە ەكى جۇمىسشى مەرت بولدى.
2020 جىلعى 22 قىركۇيەكتە بالقاش قالاسىنداعى مىس قورىتۋ زاۋىتىندا جابدىقتاردى جوندەۋ كەزىندە ءبىر قىزمەتكەر ەلەكتر توگىنىڭ سوعۋىنان قايتىس بولدى.
2022 جىلى
2022 جىلدىڭ 28 تامىزىندا جاستار كومىر رازرەزىندە كارەرگە ارنالعان اۋىر بەلاز كولىگى مەن ۋاز سوقتىعىسىپ، ەكى ادام مەرت بولىپ، ۇشەۋى جاراقات الدى.
2023 جىلى
بۇل جىلى «قازاقمىستا» 6 ادام قايتىس بولعان.
20 قىركۇيەك كۇنى بالقاش مىس قورىتۋ زاۋىتىندا مونتاج قىزمەتكەرى قازا تاپتى.
اراعا ءبىر جارىم اي سالىپ، 5 قاراشا كۇنى شىعىس جەزقازعان كەنىشىندەگى №57 شاحتادا تاۋ جىنىسىنىڭ وپىرىلۋى سالدارىنان كەن شەبەرى كوز جۇمدى.
2023 جىلدىڭ 22 قاراشاسىندا جەزقازعان بايىتۋ فابريكاسىنىڭ №2 بولىمىندە جۇمىسشىنى كونۆەيەر مەحانيزمى قىسىپ تاستاپ، ايەل ادام قايتىس بولدى.
5 كۇننەن سوڭ، 27 قاراشادا – «جايسان» كەنىشىندە 1981 جانە 2002 جىلى تۋعان ەكى شاحتەر قازا بولدى.
2023 جىلدىڭ 26 جەلتوقسانى – «شىعىس سارى-وبا» شاحتاسىندا 31 جاستاعى ماشينيست جەراستى تەحنيكاسىنىڭ استىندا قالىپ، مەرت بولدى.
2024 جىل
2024 جىلدىڭ 7 قازانى كۇنى قاراعاندى وبلىسىنداعى «ساياق-3» شاحتاسىندا ءيىس گازىنىڭ تارالۋى سالدارىنان ەكى ادام قازا تاپتى.
2025 جىل
ال 2025 جىلدىڭ 21 قاڭتارىندا شىعىس جەزقازعان كەنىشىندەگى «اننەنسكايا» شاحتاسىندا 40 جاستاعى ۇنتاقتاۋشى مەرت بولدى.
ءبىر ايدان سوڭ، 17 اقپاندا ۇلىتاۋ وبلىسىنداعى «جومارت» كەنىشىندە تاۋ وپىرىلىپ، جەتى كەنشى ءۇيىندى استىندا قالدى. كەيىننەن جەتى ادامنىڭ ءمايىتى جەر استىنان شىعارىلىپ، جەرلەندى.
«قازاقمىس» كورپوراتسياسى — قازاقستاننىڭ جەتەكشى تاۋ-كەن جانە مەتاللۋرگيا كومپانيالارىنىڭ ءبىرى. 1992 جىلى قازاقستان ۇكىمەتى «جەزقازعانتۇستىمەت» اتاۋىمەن اكتسيونەرلىك قوعام قۇردى، كەيىننەن ول «قازاقمىس» كورپوراتسياسىنا اينالدى. 1995 جىلى كومپانيا وڭتۇستىك كورەيانىڭ «سامسۋنگ دويچلاند گمبح» كورپوراتسياسىنىڭ باسقارۋىنا بەرىلدى، بۇل شەشىم ءوندىرىستى قالپىنا كەلتىرۋ جانە ينۆەستورلار تارتۋ ماقساتىندا قابىلداندى. 1997 جىلى كومپانيا اتاۋى «قازاقمىس» بولىپ وزگەرتىلدى.
رەسمي سايتتا "قازاقمىس" كورپوراتسياسى جشس باسقارما توراعاسى رەتىندە نۇريەۆ نۇراحمەت قاناتۇلى، «Kazakhmys Holding» (قازاقمىس حولدينگ) جشس ديرەكتورلار كەڭەسى توراعاسىنىڭ ءبىرىنشى ورىنباسارى - اندرەي پاۆلوۆيچ گايدين، ۆلاديمير كيم مەن ەدۋارد وگاي “قازاقمىس” اكتسيونەرلەرى رەتىندە كورسەتىلگەن.
سىمبات ناۋحان
«ادىرنا» ۇلتتىق پورتالى
