الماتى قالاسى كىتاپحانا سالاسىندا يننوۆاتسيالىق شەشىمدەردى بەلسەندى ەنگىزۋدى جالعاستىرۋدا. شاھار اكىمى ەربولات دوساەۆتىڭ تاپسىرماسى بويىنشا مەگاپوليستىڭ قوعامدىق ورىندارىندا العاش رەت وقىرماندارعا كىتاپ ۇسىناتىن زاماناۋي اۆتوماتتار ورناتىلدى.
وسىنداي 24 دەربەس كىتاپحانا توعىز مەترو ستانتسياسىندا پايدا بولدى: «رايىمبەك باتىر»، «جىبەك جولى»، «المالى»، «اباي»، «بايقوڭىر»، «مۇحتار اۋەزوۆ»، «الاتاۋ»، «سايران» جانە «ماسكەۋ»، سونداي-اق مەدەۋ جانە اۋەزوۆ اۋداندارىنىڭ حقكو-تارىندا، «سپۋتنيك»، «اتاكەنت»، «ازيا پاركى» سىندى ساۋدا ورتالىقتارىندا، مەدەۋ جانە تۇركسىب اۋداندارىنداعى جاستار كوميۋنيتي ورتالىقتارىندا جانە Sail كوۆوركينگىندە ورناتىلدى.
اۆتوماتتى قوندىرعىلاردىڭ كومەگىمەن وقىرماندار ءداستۇرلى كىتاپحاناعا بارماي-اق كىتاپتاردى تاڭداپ الىپ، بىرنەشە كۇن بويى وقي الادى. وقىپ بولعان سوڭ ادەبيەتتەردى 24 اپپاراتتىڭ كەز كەلگەنىنە نەمەسە قالالىق كىتاپحانالار فيليالىنا قايتارا الادى. ول ءۇشىن وقۋ بيلەتى بولۋى كەرەك. ەگەر ول بولماسا، ءسىز تىركەۋدەن ءوتىپ، «قالا وقىرماندارى كلۋبىنا قوسىلا الاسىز».
قاجەت بولعان جاعدايدا ءار ازامات «الماتى كىتاپحانالارىنا» قاراستى 28 فيليالدىڭ بىرىنەن وقىرمان بيلەتىن الا الادى، ونىڭ ۇشەۋى تاۋلىك بويى جۇمىس ىستەيدى.
ايتا كەتەرلىگى، كىتاپ وقىعاندى جاقسى كورەتىندەر almatylibrary.kz سايتىن پايدالانىپ، قاجەتتى كىتاپتاردى تاڭداپ، تاپسىرىس بەرىپ، ولاردى ونلاين رەجيمدە وقي الادى. بەرەشەك پەن بورىشكەرلەردى اۆتوماتتى تۇردە ەسەپكە الۋ ءۇشىن قايتارۋ مەرزىمدەرىن قاداعالاۋ جۇيەسى ەنگىزىلدى.
«ءبىز وقىرماندار ءۇشىن ەڭ قولايلى جاعداي جاساپ، وزىق شەشىمدەردى ەنگىزىپ جاتىرمىز. وتكەن جىلى بىرنەشە جاڭا كىتاپحانا اشىلدى، بۇل جۇمىس 2025 جىلى دا جالعاسادى. جالپى، قازىر قالا تۇرعىندارى ءۇشىن اكىمدىككە قاراستى 28 كىتاپحانا جانە قوعاپدىق ورىنداردا 24 دەربەس كىتاپحانا-اپپاراتى جۇمىس ىستەپ تۇر. ءبىز قالانىڭ ءاربىر تۇرعىنى كىتاپ وقىعانىن، بىلىمگە ۇمتىلعانىن قالايمىز. بۇل ءۇشىن كىتاپحانالار ءتىپتى جەر استىندا – مەترو ستانتسيالارىندا دا قولجەتىمدى. كىتاپحانا سالاسىن دامىتۋ ماسەلەسى قالا اكىمىنىڭ ەرەكشە باقىلاۋىندا»،- دەپ اتاپ ءوتتى الماتى قالاسىنىڭ مادەنيەت باسقارماسى.
جالپى، الماتى مادەنيەت باسقارماسىنا قاراستى كىتاپحانالاردىڭ جۇمىسى اۆتوماتتاندىرىلعان. 1,3 ميلليوننان استام كىتاپتى قۇرايتىن بۇكىل كىتاپ قورىنىڭ بىرىڭعاي ەسەبى قۇرىلدى. قىزمەتكەرلەر ەلەكتروندى كاتالوگ جۇرگىزەدى، ادەبيەتتەردى كىم قاشان العانىن قاداعالاۋ جۇيەسى ەنگىزىلگەن، بۇل قىزمەت كورسەتۋدى ەداۋىر جىلدامداتادى. كىتاپتار مەن ولاردىڭ قول جەتىمدىلىگى تۋرالى بارلىق اقپارات بىرىڭعاي مالىمەتتەر بازاسىندا قول جەتىمدى، ال كىتاپ قورىن پايدالانۋ ستاتيستيكاسى قىزمەتكەرلەرگە ادەبيەتكە دەگەن سۇرانىستى تالداۋعا كومەكتەسەدى.
ايتپاقشى، 2024 جىلى قالالىق كىتاپحانالارعا 3 ميلليوننان استام كەلۋ كورسەتكىشى تىركەلگەن. قالا كىتاپحانالارىنىڭ 95%-ى جاڭعىرتىلعان. ءار كىتاپحانادا جيھاز جانە ماتەريالدىق-تەحنيكالىق بازا جاڭارتىلدى، ينتەرنەتكە قولجەتىمدىلىك قامتاماسىز ەتىلدى، سونداي-اق الەمدىك ستاندارتتارعا سايكەس شەشىمدەر ەنگىزىلدى.
