قازاقستان كومانداسىنىڭ فريستايل-موگۋل شەبەرى اناستاسيا گورودكو يتاليانىڭ تۋرين قالاسىندا ءوتىپ جاتقان ۋنيۆەرسيادادا التىن مەدال جەڭىپ الدى، دەپ حابارلايدى "ادىرنا" ۇلتتىق پورتالى.
فينالدا قازاقستاندىق سپورتشى 79.79 ۇپاي جيناپ، ءبىرىنشى ورىندى يەلەندى. ەكىنشى ورىندى جاپوندىق حارۋكا ناكاو (76.29 ۇپاي), ال ءۇشىنشى ورىندى نەمىس سپورتشىسى حاننا ۆەسس (75.04 ۇپاي) جەڭىپ الدى.
قازاقستاننىڭ تاعى ءبىر وكىلى اياۋلىم امرەنوۆا 70.52 ۇپايمەن بەسىنشى ناتيجە كورسەتتى.
19 جاستاعى گورودكو قازاقستانعا 2025 جىلعى ۋنيۆەرسيادانىڭ العاشقى التىن مەدالىن سىيلادى.
اناستاسيا گورودكو – ءۇش دۇركىن الەم چەمپيونى. 2022 جىلى ول پاراللەل موگۋلدا التىن مەدال جەڭىپ السا، 2024 جىلى موگۋلدا ءبىرىنشى ورىنعا يە بولدى. بيىل الماتىدا وتكەن جاسوسپىرىمدەر اراسىنداعى الەم چەمپيوناتىندا پاراللەل موگۋلدا التىن مەدال ەنشىلەگەن.
ەسكە سالا كەتەيىك، 2025 جىلدىڭ 13-23 قاڭتار ارالىعىندا يتاليانىڭ تۋرين قالاسىندا جوعارى وقۋ ورىندارىنىڭ ستۋدەنتتەرى اراسىندا ءحححىى دۇنيەجۇزىلىك قىسقى ۋنيۆەرسيادا وتەدى.
بۇل جارىسقا الەمنىڭ 57 ەلىنەن 2000-عا جۋىق سپورتشى قاتىسىپ، سپورتتىڭ 11 تۇرىنەن 90 مەدال جيىنتىعى ساراپقا سالىنادى.
قازاقستان قۇراماسى 10 سپورت تۇرىنەن (بياتلون، شاڭعى جارىسى، قىسقى سپورتتىق باعدارلاۋ، فريستايل، مانەرلەپ سىرعاناۋ، شايبالى حوككەي (ەرلەر، ايەلدەر), پاراشاڭعى جارىسى، تاۋ شاڭعىسى جارىسى، شورت-ترەك) 103 سپورتشىمەن ەل نامىسىن قورعايدى.
