قىتايدا ادام مەتاپنەۆموۆيرۋسى (hMPV) دەپ اتالاتىن جاڭا ۆيرۋستىق اۋرۋدىڭ ءورشۋى تىركەلدى، دەپ حابارلايدى "ادىرنا" ۇلتتىق پورتالى Daily Mail اگەتتىگىنە سىلتەپ.
دەرەكتەرگە سۇيەنسەك، ۆيرۋس تەز تارالۋدا، سونىڭ سالدارىنان اۋرۋحانالار ناۋقاستارعا لىق تولعان. بىردەن بىرنەشە ۆيرۋس، سونىڭ ىشىندە Mycoplasma pneumoniae اينالىمدا ءجۇر.
قازىرگى ۋاقىتتا قىتاي ەل كولەمىندە جاڭا ۆيرۋس تۋرالى حابارلارعا بايلانىستى جوعارى دايىندىق رەجيمىندە. بۇل ۆيرۋس تۇماۋعا ۇقساس بەلگىلەرمەن سيپاتتالادى. الەۋمەتتىك جەلىلەردە بالالاردىڭ دەنە قىزۋىنىڭ كوتەرىلۋى، جوتەل جانە تاماق اۋرۋىمەن اۋرۋحانالارعا كوپتەپ ءتۇسىپ جاتقانى تۋرالى اقپارات تاراۋدا.
اۋرۋلاردىڭ الدىن الۋ جانە باقىلاۋ جونىندەگى قىتاي باسقارماسى جاڭا ىندەتكە قاتىستى زەرتتەۋلەر جۇرگىزىپ، ناتيجەلەرىن جاريالادى.
"اۋرۋحانالارداعى امبۋلاتورلىق جانە جەدەل جاردەم بولىمدەرىندە تۇماۋعا ۇقساس جاعدايلاردان الىنعان تىنىس الۋ سىنامالارىندا انىقتالعان قوزدىرعىشتار نەگىزىنەن تۇماۋ ۆيرۋسى، ادام مەتاپنەۆموۆيرۋسى جانە رينوۆيرۋس. ال اۋىر جەدەل رەسپيراتورلىق ينفەكتسياسى بار ناۋقاستاردىڭ سىنامالارىندا تۇماۋ ۆيرۋسى، Mycoplasma pneumoniae جانە ادام مەتاپنەۆموۆيرۋسى انىقتالدى"- دەپ مالىمدەدى باسقارما.
زەرتتەۋ ناتيجەلەرى كورسەتكەندەي، رەسپيراتورلىق ينفەكتسيالار سانى ماۋسىمدىق فاكتورلارعا بايلانىستى تۇراقتى وسۋدە. دەگەنمەن، باسقارما مالىمەتىنشە، كەيبىر پروۆينتسيالاردا Mycoplasma pneumoniae-عا شالدىعۋ ازايىپ كەلەدى، ال 14 جاسقا دەيىنگى بالالار اراسىندا مەتاپنەۆموۆيرۋسقا (hMPV) وڭ ناتيجە كورسەتكەندەر سانى ارتۋدا.
دۇنيەجۇزىلىك دەنساۋلىق ساقتاۋ ۇيىمى (ددسۇ) قىتايداعى اۋرۋدىڭ تارالۋىنا قاتىستى ازىرگە ەشقانداي مالىمدەمە جاساعان جوق.
ايتا كەتەيىك، 2023 جىلدىڭ قاراشا-جەلتوقسان ايلارىندا قىتايدا ميكوپلازمالىق ينفەكتسيا ورشىگەن بولاتىن. كەيىن بۇل اۋرۋدىڭ جەكەلەگەن جاعدايلارى دانيا، فرانتسيا، نيدەرلاندى جانە رەسەيدە دە تىركەلدى. ول كەزدە ددسۇ قىتاي مەن رەسەيدەگى جاعدايعا تۇسىنىكتەمە بەرىپ، پنەۆمونيانىڭ بۇل ءورشۋىن پاندەميالىق قاۋىپ رەتىندە ەمەس، قالىپتى قۇبىلىس رەتىندە قاراستىرعان ەدى.
