جەزقازعان قالاسىنىڭ تۇرعىندارى 2025 جىلدى ەرەكشە جاڭالىقپەن قارسى الدى. قالاداعى «قازاقمىس ەنەردجي» جشس-ءنىڭ جىلۋ ەلەكتر ورتالىعىندا جاڭارتىلعان №8 قازاندىق ىسكە قوسىلدى. بۇل نىسان تپ-13ب تيپىندەگى جاڭا تەحنولوگيالارمەن جابدىقتالعان.
قازىرگى تاڭدا جەزقازعاندا بارلىعى 8 قازاندىق جۇمىس ىستەيدى: ولاردىڭ بەسەۋى شتاتتىق رەجيمدە، ال ۇشەۋى رەزەرۆتە. جەو تاريحىندا 1993 جىلى №11 قازاندىق تولىعىمەن جاڭارتىلعان ەدى. اراعا 31 جىل سالىپ، 210 مىڭ ساعاتتان استام ۋاقىت قىزمەت ەتكەن، توزۋى 90%-دى قۇراعان №8 قازاندىق تولىقتاي جاڭارتىلدى.
2024 جىلدىڭ مامىر ايىندا «ءتاريفتى ينۆەستيتسيالارعا ايىرباستاۋ» باعدارلاماسى اياسىندا قازاقستان رەسپۋبليكاسى ەنەرگەتيكا مينيسترلىگىمەن ينۆەستيتسيالىق كەلىسىم جاسالدى. جوبانىڭ جالپى قۇنى 8,8 ميلليارد تەڭگەنى قۇرادى. 2025 جىلدىڭ شىلدەسىنەن باستاپ 2029 جىلدىڭ ماۋسىمىنا دەيىن 10,2 ميلليارد تەڭگە كولەمىندە ينۆەستيتسيالىق سالىمداردى قايتارۋ جوسپارلانعان.
جەرگىلىكتى اتقارۋشى ورگانداردىڭ قولداۋىمەن №8 قازاندىق تولىقتاي كۇردەلى جوندەۋدەن ءوتىپ، زاماناۋي ستاندارتتارعا سايكەستەندىرىلدى. قازىرگى ۋاقىتتا قازاندىق سىناق رەجيمىندە جۇمىس ىستەپ تۇر.
زاماناۋي تەحنولوگيالارمەن جابدىقتالعان قازاندىق ساعاتىنا 220 توننا بۋ وندىرۋگە قاۋقارلى. تولىق اۆتوماتتاندىرىلعان باسقارۋ جۇيەسى ماشينيستەرگە بارلىق كورسەتكىشتەردى قاشىقتان باقىلاۋعا جانە پروتسەستى ءتيىمدى باسقارۋعا مۇمكىندىك بەرەدى.
جەزقازعانعا جىلۋ بەرۋ تەمپەراتۋراسى بەلگىلەنگەن 80 گرادۋس دەڭگەيىندە ۇستالىپ وتىر، بىراق ناقتى كورسەتكىش 83 گرادۋسقا جەتىپ، قالا تۇرعىندارىن تۇراقتى ءارى ساپالى جىلۋمەن قامتاماسىز ەتۋدە. قازاندىقتىڭ تولىق ىسكە قوسىلۋى ەلەكتر ەنەرگياسى ءوندىرىسىن 40 مەگاۆاتتقا ارتتىرۋعا مۇمكىندىك بەرەدى.
بۇل جوبانىڭ ىسكە اسۋى جەزقازعان تۇرعىندارى ءۇشىن جىلۋ جانە ەنەرگيامەن سەنىمدى قامتاماسىز ەتۋ جولىندا ماڭىزدى قادام بولدى. قالادا جاڭا قازاندىقتىڭ ىسكە قوسىلۋى تۇرعىن ۇيلەردەگى جىلۋ جۇيەسىنىڭ ساپاسىن ارتتىرىپ، تەمپەراتۋرانىڭ بۇرىنعىدان جوعارى بولۋىن قامتاماسىز ەتتى.
جاڭا قازاندىق قالا تۇرعىندارىنىڭ تۇرمىس ساپاسىن جاقسارتىپ، جەزقازعاننىڭ ەنەرگەتيكالىق الەۋەتىن ارتتىرادى.
