ازەربايجان پرەزيدەنتى يلحام اليەۆ اقتاۋ ماڭىندا اپاتقا ۇشىراعان ۇشاقتىڭ جەردەن اتقىلانعانىن مالىمدەپ، رەسەيگە قويعان شارتتارىنىڭ ورىندالۋىن تالاپ ەتتى، دەپ حابارلايدى "ادىرنا" ۇلتتىق پورتالى AzTV تەلەارناسىنا سىلتەپ.
«العاشقى نۇسقالار بويىنشا جۇمىس جۇرگىزىلىپ جاتىر. بىراق ناقتى قورىتىندىلاردى «قارا جاشىكتەردى» تالداۋدان كەيىن عانا جاساۋعا بولادى. دەگەنمەن قازىردىڭ وزىندە ۇشاقتىڭ گروزنىي ماڭىنداعى رەسەي اۋە كەڭىستىگىندە سىرتقى زاقىم العانى انىق كورىنىپ تۇر. ءبىزدىڭ ۇشاققا راديوەلەكتروندىق اسەر جاسالعانى تۋرالى دالەلدەر بار. سونداي-اق جەردەن اتقىلاۋ سالدارىنان ۇشاقتىڭ ارتقى بولىگى مەن فيۋزەلياجى قاتتى زاقىمدانعانى بەلگىلى»، – دەدى اليەۆ.
پرەزيدەنت رەسەي رەسمي تۇردە كەشىرىم سۇراپ، ءوز كىناسىن مويىنداۋى، كىنالىلەردى جاۋاپقا تارتۋى جانە ازەربايجانعا، سونداي-اق زارداپ شەككەن جولاۋشىلار مەن ەكيپاج مۇشەلەرىنە وتەماقى تولەۋى ءتيىس ەكەنىن اتاپ ءوتتى.
«ءبىر تالاپ ورىندالدى – رەسەي كەشىرىم سۇرادى. قالعان شارتتاردىڭ ورىندالۋىن كۇتەمىز»، – دەدى اليەۆ تەلەارناعا بەرگەن سۇحباتىندا.
اليەۆ اڭگىمەنىڭ باسىنا ورالىپ، رەسەيدىڭ بولعان جاعدايدى جاسىرۋعا تىرىسقانىنا تاڭدانىسىن ءبىلدىردى.
«ءبىزدى رەسمي قۇرىلىمداردىڭ گاز باللونىنىڭ جارىلۋى تۋرالى بولجامدار ۇسىنۋى قىنجىلتتى جانە تاڭعالدىردى. بۇل رەسەي تاراپىنان ماسەلەنى جابۋعا تىرىسقانىن انىق كورسەتەدى. بۇل ارينە، ەشكىمگە ابىروي اپەرمەيدى. وكىنىشكە قاراي، العاشقى ءۇش كۇندە رەسەي تاراپىنان تەك ورىنسىز نۇسقالاردى ەستىدىك»، – دەپ ءبولىستى اليەۆ.
ازەربايجان تەرگەۋدى مەملەكەتارالىق اۆياتسيالىق كوميتەتكە بەرۋدەن باس تارتتى. ويتكەنى ونىڭ جۇمىسىنىڭ وبەكتيۆتىلىگىنە كۇمان كەلتىردى.
پرەزيدەنتتىڭ تاپسىرماسىمەن رەسەيدىڭ جەتى قالاسىنا اۋە رەيستەرى بەلگىسىز مەرزىمگە توقتاتىلدى. سونداي-اق رەسەيلىك اۋە كومپانيالاردىڭ ازەربايجاننىڭ ءۇش قالاسىنا رەيستەرى شەكتەلدى. بۇل شەشىم جولاۋشىلار قاۋىپسىزدىگى ءۇشىن قابىلداندى.
