ءازىربايجان پرەزيدەنتى يلحام اليەۆ AZAL اۋە كومپانياسىنىڭ ۇشاعى اقتاۋ ماڭىندا اپاتقا ۇشىراعان كەزدە كورسەتكەن ساۋاتتى ءىس-قيمىلدارى ءۇشىن قاسىم-جومارت توقاەۆقا جانە قازاقستان حالقىنا العىسىن ءبىلدىردى، دەپ حابارلايدى "ادىرنا" ۇلتتىق پورتالى.
بۇل تۋرالى sfera.az جازدى.
«ەڭ الدىمەن، مەن پرەزيدەنت توقاەۆقا قوڭىراۋ شالىپ، العىسىمدى ءبىلدىردىم. اپات بولعان ساتتە-اق، وقيعا ورنىنا بىردەن قازاقستاندىق قۇتقارۋشىلار كەلىپ، سىنعان فيۋزەلياجدان ادامداردى شىعارا باستادى. ولار جارىلىس بولۋى مۇمكىن ەكەنىن بىلمەي، ءوز ومىرلەرىن قاتەرگە تىكتى. بىراق سوعان قاراماستان، ناعىز ەرلىك كورسەتتى»، – دەدى اليەۆ.
جۋرناليستەردىڭ سۇراقتارىنا جاۋاپ بەرە وتىرىپ، ول قازاقستاندىق دارىگەرلەردىڭ جۇمىسىن جانە بۇكىل ەل ازاماتتارىنىڭ تراگەدياعا دەگەن كوزقاراسىن اتاپ ءوتتى.
«ءبىزدىڭ قازاق باۋىرلارىمىز بەن اپكە-قارىنداستارىمىزدىڭ ىنتىماقتاستىعى ءازىربايجان حالقىنىڭ جۇرەگىندە ۇلكەن ءىز قالدىردى. قاراپايىم ازاماتتار اقتاۋداعى ءبىزدىڭ كونسۋلدىققا كەلىپ، گۇل شوقتارىن قويىپ، ءوز سەزىمدەرى مەن ىنتىماقتاستىقتارىن ءبىلدىردى. بۇل – ناعىز دوستىق پەن باۋىرمالدىقتىڭ بەلگىسى»، – دەدى ءازىربايجان پرەزيدەنتى.
اليەۆ تراگەديانى تەرگەۋ ماسەلەلەرىن قازاقستان پرەزيدەنتىمەن تالقىلاعانىن جانە ونىڭ تۇسىنىستىك تانىتقانىن ايتتى.
«سونىمەن قاتار، مەن پرەزيدەنت توقاەۆقا قايعىرا كوڭىل ايتتىم، ويتكەنى اپات سالدارىنان التى قازاقستاندىق ازامات قازا تاپتى. ول دا ماعان كوڭىل ايتتى. وسى قايعىلى جاعدايعا قاراماستان، قازاقستانمەن دوستىق پەن باۋىرلاستىق قارىم-قاتىناسىمىز ودان ءارى نىعايا ءتۇستى»، – دەپ تۇيىندەدى اليەۆ.
