شىعىس قازاقستان وبلىسىنىڭ بۇرىنعى اكىمى دانيال احمەتوۆكە قورعانىس ءمينيسترى بولعان كەزىندە يزرايلدىك تاراپتان دوللار تولى ديپلومات العان دەگەن ايىپ تاعىلدى. بۇل تۋرالى كەڭەس جانە قازاقستاندىق اسكەري قايراتكەر، گەنەرال-مايور تۇرسىن ايجۇلوۆ الەۋمەتتىك جەلىدەگى پاراقشاسىندا جاريالادى، دەپ حابارلايدى "ادىرنا" ۇلتتىق پورتالى كازتاگ-قا سىلتەمە جاساپ.
«كارىبجانوۆ شىعىس قازاقستان وبلىسىنىڭ اكىمى رەتىندە ۇزاق جۇمىس ىستەگەن جوق. وندا نازارباەۆتىڭ جاقىن تۋىستارى مەن وداقتاستارىنىڭ ۇلكەن مۇددەلەرى بولدى، ال بۇل مۇددەلەردى قورعاۋ مەن جۇزەگە اسىرۋ ءۇشىن كارىبجانوۆ جارامادى. سەبەبى ول ادال ادام ەدى. ونىڭ ورنىنا بەرگەنەۆتى تاڭدادى. ول نازارباەۆ اۋلەتىنە، اسىرەسە داريعاعا (نازارباەۆاعا) قولايلى بولدى. بىراق كوپ ۇزاماي ونىڭ ورنىنا تاعى دا باسقا ادام – دانيال احمەتوۆتى قويدى. ول سەنىمدى ادام بولاتىن. راسىمەن، بۇعان دەيىن احمەتوۆ اسكەري قارسى بارلاۋ قىزمەتىنىڭ چەكيستەرى تاراپىنان قورعانىس ءمينيسترى بولىپ تۇرعان كەزىندە يزرايلدىكتەردەن دوللار تولى ديپلومات العانى ءۇشىن ۇستالعان ەدى. الايدا ونى نۇرسۇلتان ءابىشۇلى كەشىردى. احمەتوۆ چۋبارادا ىشىمدىككە سالىنىپ كەتە جازداعان. كەيىن ول مينيستر رەتىندە ماسكەۋگە جىبەرىلدى، ودان كەيىن شىعىس قازاقستان وبلىسىنىڭ اكىمى قىزمەتىنە تاعايىندالدى. بۇل نازارباەۆ اۋلەتىنىڭ مۇددەسى ءۇشىن جاسالعان «بەرىك شەشىم» ەدى. ءنان قىزمەتىنەن كەتەر الدىندا ونىڭ اكىمدىك وكىلەتتىگىن ۇزارتقانى دا بەكەر ەمەس. احمەتوۆتى ۇستاپ العان اسكەري قارسى بارلاۋ قىزمەتكەرلەرىن جۇمىستان شىعارىپ، زەينەتكە جىبەردى»، - دەپ جازدى ايجۇلوۆ الەۋمەتتىك جەلىدەگى پاراقشاسىندا.
ەسكە سالايىق، توعىز جىل بويى شقو اكىمى بولعان احمەتوۆ 2023 جىلعى ماۋسىمدا قىزمەتىنەن بوساتىلدى. ول قورعانىس ءمينيسترى قىزمەتىن 2007 جىلدىڭ قاڭتارىنان 2009 جىلدىڭ ماۋسىمىنا دەيىن اتقارعان.
