فۋتبولدان قازاقستان قۇراماسى ۇلتتار ليگاسىنىڭ سوڭعى ويىنىندا نورۆەگيا قۇراماسىنان 5:0 ەسەبىمەن جەڭىلىپ قالدى، دەپ حابارلايدى «ادىرنا» ءتىلشىسى.
توپتىق كەزەڭ ناتيجەسىندە نورۆەگيا قۇراماسى 13 ۇپاي جيناپ، 1-ورىنعا شىقتى. قازاقستان بولسا، التى ويىننىڭ بارلىعىندا بىردە-ءبىر گول سوعا الماي، جالعىز ۇپايدى ءوز الاڭىندا نورۆەگيامەن وتكەن ماتچتا تەڭ ويناۋ ارقىلى الدى. وسىلايشا وتانداستارىمىز س ديۆيزيونىنا ءتۇسىپ قالدى.
قازاقستان ۇلتتار ليگاسىنىڭ بيىلعى ماۋسىمىندا ۆ دەڭگەيىندە وينادى. جەرەبە تارتقاندا قازاقستان قۇراماسى اۆستريا، نورۆەگيا جانە سلوۆەنيامەن ءبىر توپقا تۇسكەن بولاتىن.
17 قاراشادا ۇلتتىق قۇرامانىڭ باس باپكەرى ستانيسلاۆ چەرچەسوۆ نورۆەگيامەن وتكەن ماتچ تۋرالى پىكىرىن ايتتى.
«وسى ماۋسىمدا قاتەلىك جىبەرمەي وتكىزگەن جالعىز ويىنىمىز الماتىداعى نورۆەگياعا قارسى شىعار. سونىڭ ارقاسىندا ۇپاي ەنشىلەدىك. بارلىق ويىندا قاتەلىكتەرىمىزدەن گول جىبەردىك. بۇگىن دە بولمايتىن جەردەن قاتەلىك جىبەرىپ، گول وتكىزدىك. ءيا، قارسىلاسىمىز مىقتى، قىسىم كورسەتتى، بىراق قىسىم ەشتەڭەنى بىلدىرمەيدى. جىگىتتەر تىرىستى، سول ءۇشىن ولارعا العىسىمدى ايتتىم، بىراق بۇنداي قاتەلىكتەردەن كەلەسى ماۋسىمدا قۇتىلۋىمىز كەرەك.
بيىل ءوزى وسىنداي ساتسىزدىككە تولى جىل بولدى، كەلەسى جىلى باسىنان باستاۋىمىز قاجەت. جەرەبەنى كۇتىپ، كەلەسى جىلعا دايىندالامىز»، – دەدى باپكەر.
