قازاقستان بەنزين، ديزەل وتىنى جانە اۆياوتىن بويىنشا ءالى دە ايتارلىقتاي يمپورتقا تاۋەلدى بولىپ شىقتى، دەپ حابارلايدى «ادىرنا» ۇلتتىق پورتالى، كازتاگ اگەنتتىگىنە سىلتەمە جاساپ.
«بەنزين بويىنشا - 10-15 پايىزعا دەيىن، ديزەل وتىنى بويىنشا - 20 پايىزعا دەيىن، اۆياوتىن بويىنشا 40 پايىزعا دەيىن يمپورتقا تاۋەلدىلىك بار»، - دەپ حابارلادى سارسەنبىدە باسەكەلەستىكتى قورعاۋ جانە دامىتۋ اگەنتتىگى قازتاگ رەداكتسياسىنىڭ سۇراۋىنا جاۋاپ بەرە وتىرىپ.
2022 جىلى مەملەكەت سۇيىتىلعان مۇناي گازىن رەتتەۋ كەزىندە جانار-جاعارماي ماتەريالدارىنىڭ باعاسىن رەتتەۋدى ەنگىزدى، ال 2023 جىلى – كوتەرمە ساۋدا نارىعىنا باقىلاۋ ورناتىلدى.
قازاقستاننىڭ ەنەرگەتيكا مينيسترلىگى مەن باسەكەلەستىكتى قورعاۋ اگەنتتىگى وتىن نارىعىندا كەلەسى شارالاردى قابىلدادى:
قازاقستاننىڭ باسەكەلەستىكتى قورعاۋ اگەنتتىگى مالىمدەگەندەي، مەملەكەت نارىقتا مۇناي مەن ونىڭ ونىمدەرىن رەتتەۋ ءۇشىن كەلەسى قۇرالداردى قولدانادى:
- ىشكى نارىققا مۇناي جەتكىزۋدى كۆوتالاۋ: بۇل شارا وتاندىق نارىقتى قورعاۋ ماقساتىندا جۇزەگە اسىرىلادى.
- بولشەك جانە كوتەرمە باعالاردى بەكىتۋ: باعالاردى نارىقتىق ينديكاتورلارعا بايلانىستىراماي بەكىتۋ، ياعني بۇل باعالاردىڭ كورشى ەلدەرمەن سالىستىرعاندا 20% -50% ايىرماشىلىعىن بىلدىرەدى.
- مۇناي ونىمدەرىن ەكسپورتتاۋعا تىيىم سالۋ: بۇل شارا ىشكى نارىقتاعى تاپشىلىقتى بولدىرماۋ ءۇشىن ەنگىزىلگەن.
بۇل شارالاردىڭ ماقساتى – وتىن نارىعىن تۇراقتاندىرۋ مەن يمپورت تاۋەلدىلىگىن تومەندەتۋ.
«اتالعان شارالارمەن قاتار مۇنايدىڭ باعاسىن كەرى ەسەپتەۋ ادىستەمەسى، قازاقستاننىڭ ىشكى نارىعىندا مۇناي باعاسىن نارىقتىق مەحانيزمدەرمەن بايلانىسسىز قالىپتاستىرۋعا الىپ كەلەدى. وسىلايشا، مۇنايدىڭ الەمدىك نارىقتاعى باعاسىنىڭ اسەرى قازاقستانداعى باعالاردى قالىپتاستىرۋدىڭ قولدانىستاعى قۇرالدارىمەن شەكتەلەدى. مۇناي ونىمدەرىنىڭ كورشىلەس ەلدەرمەن سالىستىرعانداعى باعاسىنىڭ ديسپاريتەتى ترانزيتتىك كولىكپەن تۇتىنۋدىڭ ارتۋىنا جانە زاڭسىز ەكسپورتتىڭ كۇشەيۋىنە اكەلەدى»، — دەلىنگەن اگەنتتىكتىڭ مالىمدەمەسىندە.
اتالعان جاعدايدا، وڭدەۋ قۋاتتارىنىڭ تاپشىلىعى مەن مۇناي ءوندىرۋ كولەمىنىڭ ازايۋى مەملەكەتتىك رەتتەۋ ساياساتىنىڭ ناتيجەسىندە مۇناي جانە مۇناي ونىمدەرى نارىعىندا تاپشىلىققا اكەلەدى. بۇل، ءوز كەزەگىندە، مۇناي وندىرۋگە، وڭدەۋگە، وتىن ساقتاۋعا ينۆەستيتسيالاردىڭ تومەندەۋى سالدارىنان مۇناي ونىمدەرى نارىعىنىڭ تاپشىلىعىنا الىپ كەلەدى.
