كىتاپ وقۋدىڭ حيكمەتى مەن قىزىعى جايىندا وي بولىسكەن مادەنيەت سالاسىنىڭ بەلسەندىسى قاراپايىم ارەكەتتەر كىشكەنتاي قادامداردان باستالادى دەيدى.
قازاقستاندى كىتاپ وقيتىن ەلگە اينالدىرۋ ميسسياسىنىڭ اياسىندا تۋىنداعان Kitapal club, Kitapal podcast, اۋىلعا Kitapal جوبالارىنىڭ جەتەكشىسى دانيار جىگىتبەك اتقارىلعان جۇمىستارىمەن ءبولىسىپ، الداعى جوسپارلارىن تانىستىردى.
- «قازاقستاندى كىتاپ وقيتىن ەلگە اينالدىرۋ» ميسسياڭىزدى ويداعىداي جۇزەگە اسىرىپ جاتىرسىز با؟
- قازاقستاندى كىتاپ وقيتىن ەلگە اينالدىرۋ ميسسيامىز ويداعىداي جۇزەگە اسىپ جاتىر دەپ ايتا الامىن. وعان دالەل – كۇندە بىزگە كەلىپ جاتقان حاتتار. «سىزدەردىڭ جوبالارىڭىز ارقىلى قىزىعۋشىلىعىم ارتىپ، كىتاپ وقي باستادىم»، «مەكتەبىمىزدە، ورتامىزدا وسىنداي كىتاپ وقۋ شارالارىن جاسادىق» دەگەن سياقتى حاتتار كەلىپ جاتىر.
بۇل ءبىزدىڭ ەڭبەگىمىزدىڭ كىشكەنتاي جەمىسى دەپ ويلايمىن. ءبىز ىستەمەگەندە مۇنداي نارسەلەر بولماس پا ەدى دەگەن وي كەلەدى. ميسسيامىز جۇزەگە اسىپ جاتىر، وسىلاي جالعاسا بەرەدى دەگەن ءۇمىتىمىز بار.
- اۋىلعا كىتاپ جەتكىزەتىن جوباڭىزدا قانداي جاڭالىقتار بار؟ ناتيجەلەرمەن بولىسسەڭىز.
- اۋىلعا Kitapal جوباسى اياسىندا 400-گە جۋىق كىتاپ جەتكىزدىك. بيىلعى ماقساتىمىزعا جەتتىك. بۇيىرسا، كەلەسى مەجە – 1000 اۋىل. ءبىزدىڭ ەرىكتىلەرىمىز دە، قولداۋشىلارىمىز دا كوبەيىپ جاتىر. سول ءۇشىن بۇل جوبا جالعاسىن تابادى دەپ سەنەمىز.
- جاقىندا Kitapal club وقىرماندار كلۋبىمەن ۇلكەن جيىن وتكىزگەلى جاتىر ەكەنسىزدەر. قانداي ناتيجە كۇتەسىز؟
- قاراشانىڭ 2-ءسى كۇنى Kitapal club قازاقستانداعى ەڭ ۇلكەن وقىرماندار قاۋىمداستىعىنىڭ ءبىر جىلدىعىن استانا قالاسىندا وتكىزگەلى جاتىرمىز. بۇل دا ءبىر ۇلكەن ناتيجە. وقىرماندارىمىزدىڭ سانى مەن ساپاسىنىڭ ارتقانىن كۇتەمىز. بۇل كەشتە تەك Kitapalclub-تىڭ مۇشەلەرى عانا ەمەس، سىرتتان دا كەلەتىن قوناقتار بولادى. سول ءۇشىن بۇل جاقسىلىقتى جايۋ جوباسى دەسەك تە بولادى.
- وسى كۇنگە دەيىن جاستار كىتاپ وقىمايدى، قازاق ءتىلدى كىتاپتار وقيتىندار از دەگەن سوزدەردى ءجيى ەستىپ كەلدىك. قالاي ويلايسىز، ەلىمىزدە كىتاپ وقۋ مادەنيەتى قالىپتاستى ما؟
- ەلىمىزدە كىتاپ وقۋ مادەنيەتى قالىپتاسىپ كەلە جاتىر دەپ ويلايمىن. ءبىزدىڭ جاستىق شاقپەن قازىرگى جاستاردى سالىستىرساق، قازىر كىتاپ وقيتىندار كوبىرەك دەپ ايتا الامىن. ءبىز دۇرىس باعىتتا دامىپ كەلە جاتىرمىز.
- قاتەلەسپەسەم، ءار نارسەنى ۇيرەتەتىن كىتاپتار جازىلسا دەپ ەدىڭىز. كىتاپتى كەز كەلگەن ادام جازاتىن بولسا، قۇنىن جوعالتادى دەپ ويلامايسىز با؟
- كىتاپتى كەز كەلگەن ادام جازادى دەگەندى مەڭزەمەدىم. ءبىز ءار سالانىڭ مامانى ءوز سالاسى بويىنشا كىتاپ جازعانىن قولدايمىز، قالايمىز جانە سوعان شاقىرامىز. ءبىزدىڭ باعىتىمىز سونداي. ءار ادام، ءار مامان ءوز سالاسى بويىنشا كىتاپ جازسا بىزدە كىتاپ قورى دا، ءبىلىم قورى دا كوبەيەتىن ەدى. جاقسىلىق اكەلمەسە، ونىڭ ەشقانداي جاماندىعى جوق.
- كىتاپ وقۋ مادەنيەتىن ارتتىرۋ ءۇشىن ءۇشىن مەكتەپتە، ۋنيۆەرسيتەتتە رەفورما جاساۋ كەرەك دەپ ويلايسىز با؟
- كىتاپ وقۋدى ارتتىرۋ ءۇشىن ۇلكەن رەفورما جاساۋدىڭ قاجەتى جوق دەپ ويلايمىن. تەك كىشكەنتاي قادامدار مەن شەشىمدەر قوسسا جەتكىلىكتى بولار ەدى. ول قانداي دەسەڭىز، ءار ساباقتىڭ باسىندا ون مينۋت كىتاپ وقۋ دەگەن ەرەجەنى بەكىتسە، جەمىسىن مىندەتتى تۇردە كورەمىز.
- ەلىمىزدەگى كىتاپحانالاردى جانداندىرىپ، جاستاردىڭ قىزىعۋشىلىعىن تۋدىرۋ ءۇشىن نە ىستەۋ كەرەك دەپ ويلايسىز؟
- كىتاپحانالاردى جانداندىرۋ ماسەلەسى بويىنشا زاماناۋي كىتاپتار قورىن جاساقتاۋ كەرەك. سوسىن سول كىتاپتاردى وقىپ، تالدايتىن وقىرمان كلۋبتاردى كوپتەپ اشۋ قاجەت. كلۋبتاردى ءتۇرلى تاتتىمەن، شايمەن باس قوسۋعا قىزىقتىرىپ، ىنتالاندىرسا دەگەن ۇسىنىسىم بار.
- جاقىندا «نە ءۇشىن ۇيلەنۋ كەرەك؟» كىتابىڭىز قىرعىز تىلىنە اۋدارىلدى. بۇل قالاي جۇزەگە استى؟
- ءيا، جاقىندا اۋدارىلىپ، 2000 دانا بولىپ باسىلدى. قىرعىز باسپاسىنىڭ ءبىرى اۋدارساق بولا ما دەگەن ءوتىنىش جاسادى. ءسويتىپ كەلىسىم-شارت جاساسىپ، كىتاپتى اۋداردى. باسىپ شىعارىپ، تاراتىپ جاتىر. قىرعىز وقىرماندار جاقسى باعا بەرىپ جاتىر. مەنىڭ كىتاپتارىمنىڭ پايداسى كوپ ادامعا ءتيىپ جاتقانىنا قۋانىشتىمىن.
- سۇحباتتاسقانىڭىزعا راقمەت!
مەرەي مىرزاعاليقىزى
«ادىرنا» ۇلتتىق پورتالى
