2024 جىلدىڭ 23 قازانىندا بۇۇ باس حاتشىسى انتونيۋ گۋتەرريش رەسەيدىڭ قازان قالاسىنا XVI بريكس سامميتىنە قاتىسۋ ءۇشىن كەلدى. باس حاتشىنى قالا مەرى يلسۋر مەتشين قارسى الدى. بۇل سامميتكە 36 ەلدىڭ جانە التى حالىقارالىق ۇيىمنىڭ وكىلدەرى قاتىسۋدا, دەپ حابارلايدى «ادىرنا» ۇلتتىق پورتالى.
سامميت اياسىندا بىرنەشە جوعارى دەڭگەيلى كەزدەسۋلەر وتۋدە. اتاپ ايتقاندا، رەسەي پرەزيدەنتى ۆلاديمير پۋتين مەن قىتاي توراعاسى سي ءتسزينپيننىڭ قازان كرەملىندە وتكەن كەزدەسۋى حالىقارالىق تۇرعىدا نازار اۋدارتتى.
سامميت بارىسىندا ساۋدا، ەكونوميكا، تەحنولوگيا، سونداي-اق جاڭا جاھاندىق ەكونوميكالىق جۇيەنى قۇرۋ ماسەلەلەرى تالقىلاندى. تاتارستان ءوز كەزەگىندە قوناقتاردى ۇلتتىق داستۇرلەرمەن تانىستىرىپ، جوعارى دەڭگەيدەگى ۇلتتىق تاعامدار ۇسىنىپ، مادەني باعدارلامالار ۇيىمداستىردى.
بۇۇ باس حاتشىسىنىڭ سامميتكە قاتىسۋى الەمدىك ساياساتتا ۇلكەن رەزونانس تۋدىردى. اقش مەملەكەتتىك دەپارتامەنتى بۇل قادامدى ەرەكشە اتاپ ءوتىپ، بۇۇ-نىڭ رەسەيدىڭ ۋكرايناعا باسىپ كىرۋىنە قارسى ۇستانىمىن ەسكە سالدى. اقش مەملەكەتتىك دەپارتامەنتىنىڭ وكىلى ۆەدانت پاتەل اتاپ وتكەندەي، امەريكا قۇراما شتاتتارى بريكس-ءتىڭ كەيبىر ەلدەرىمەن، سونىڭ ىشىندە برازيليا، ءۇندىستان جانە وڭتۇستىك افريكامەن ەكىجاقتى نەگىزدە جاقسى قارىم-قاتىناستار ورناتقان. سونىمەن قاتار، قىتايمەن باسەكەلەستىكتى باسقارۋ ماڭىزدى ماقسات رەتىندە قاراستىرىلۋدا، ال رەسەيگە قاتىستى ۆاشينگتون اگرەسسياعا قارسى ۇستانىمىن ساقتايتىنىن مالىمدەدى.
ايتا كەتۋ كەرەك، بۇۇ باس حاتشىسى بۇدان الدىن شۆەيتساريا ۇيىمداستىرعان ۋكراينا ماسەلەسى بويىنشا "بەيبىتشىلىك سامميتىنە" قاتىسپاعان ەدى.
بريكس ءسامميتى 24 قازانعا دەيىن جالعاسادى جانە ونىڭ ناتيجەلەرى جاھاندىق ەكونوميكالىق جانە ساياسي ساحناداعى نەگىزگى باعىتتارعا ىقپال ەتۋى مۇمكىن.
