كوكشەتاۋ قالاسىندا «الاش ارىستارى» ساياباعىنىڭ بازاسىندا كۇندىزگى جازعى «دانا بالا» تۋريستىك ەتنولاگەرىندە ءبىرىنشى اۋىسىم باستالدى. لاگەر جۇمىسىن قالالىق اكىمدىكتىڭ قولداۋىمەن ءبىلىم ءبولىمى، «اۋلەت» مەكتەپتەن تىس جۇمىس ورتالىعى ۇيىمداستىرىپ وتىر.
لاگەر ءار ءتۇرلى دەمالىس باعىتتارى بويىنشا 6 اۋىسىمعا ەسەپتەلگەن: «دانا بالا» تۋريستىك ەتنولاگەرى (2 اۋىسىم), «ارلان» اسكەري-پاتريوتتىق لاگەرى (2 اۋىسىم), «كاراتە شيتو-ريۋ» سپورتتىق لاگەرى (2 اۋىسىم).
ۇيىمداستىرۋشىلاردىڭ ايتۋىنشا، ساياباق اۋماعىندا 4 ۇلتتىق كيىز ءۇي ورنالاسقان. جازعى دەمالىس بالالاردىڭ بەلسەندى دەمالىسى، قازاقستان تاريحى، كورنەكتى قازاقستاندىق تۇلعالار تۋرالى بىلىمدەرىن كەڭەيتۋ، قازاق حالقىنىڭ مادەنيەتىن، ءتىلىن، داستۇرلەرى مەن ادەت-عۇرىپتارىن زەردەلەۋ، بالالاردى سپورتقا باۋلۋ، بالالاردىڭ تابيعي جاعدايدا ءومىر ءسۇرۋ داعدىلارىن الۋ، بالالاردى پاتريوتتىق تاربيەلەۋ، ادامگەرشىلىك جانە ەرىكتىك قاسيەتتەردى تاربيەلەۋ ءۇشىن ۇيىمداستىرىلعان.
«دانا بالا» تۋريستىك ەتنولاگەرىندە باعدارلاماعا سايكەس اعاش وڭدەۋ، بىلعارى وڭدەۋ، مەتالدان ويۋ، ۇلتتىق اسپاپ دومبىرا شەرتۋ، ءجۇندى ءيىرۋ جانە كيىز باسۋ بويىنشا شەبەرلىك سىنىپتارى وتەدى.
بالالار ءۇشىن «قۇلاگەر» اتشابارىندا كوشپەلى ەكسكۋرسيا وتەدى، وندا ولارعا ۇلتتىق سپورت تۇرلەرى كورسەتىلەدى: ساداق اتۋ، كوكپار، بايگە.
سونىمەن بىرگە، اۋىسىم بارىسىندا بالالارمەن اسىق اتۋ، بەس اسىق، توعىزقۇمالاق، ارقان تارتۋ سياقتى ۇلتتىق ويىندار وتكىزىلەدى. «اۋلەت» مەكتەپتەن تىس جۇمىس ورتالىعىنىڭ پەداگوگتارى تۋريستىك تۇرمىس، جورىق مارشرۋتىن جاساۋ، تۋريستىك توراپتار، وت جاعۋ تۇرلەرى مەن تاسىلدەرى بويىنشا وقىتۋ جۇرگىزەدى، كارتامەن، كومپاسپەن جۇمىس ىستەۋدى ۇيرەتەدى.
