شىمكەنت قالاسىنىڭ اكىمى عابيت سىزدىقبەكوۆ پەن «Fujian Hengwang Investment Co.، Ltd» كومپانياسىنىڭ باسقارما توراعاسى ليۋ يۋنمين قالادا مەتاللۋرگيالىق زاۋىت سالۋ تۋرالى مەموراندۋمعا قول قويدى. مەموراندۋم الدىڭعى كەزدەسۋدىڭ قورىتىندىسى بويىنشا قول جەتكىزىلگەن كەلىسىمدەر اياسىندا جاسالدى. وتكەن اپتادا مەگاپوليس باسشىسى ينۆەستورلاردى اۋماعىندا زاۋىت سالۋ جوسپارلانىپ وتىرعان «تەمىر» يندۋستريالىق ايماعىمەن تانىستىردى.
ايتا كەتۋ كەرەك، جوبانى جۇزەگە اسىرۋ بارىسىندا كومپانيا قالا ەكونوميكاسىنا 1 ميلليارد 750 ميلليون اقش دوللارىن ينۆەستيتسيالاپ، مىڭ جاڭا جۇمىس ورنىن اشادى. ءۇش كەزەڭدىك مەتاللۋرگيالىق زاۋىت بەس جىل ىشىندە سالىنادى. جىلدىق وندىرىستىك قۋاتى بەس ميلليون توننانى قۇرايدى. كاسىپورىن ەكولوگيالىق قاۋىپسىزدىكتى قامتاماسىز ەتۋ ءۇشىن الەمدەگى ەڭ وزىق تەحنولوگيالاردى پايدالاناتىن بولادى.
قالا اكىمى كومپانيا باسشىلىعىنا مەگاپوليسكە قىزىعۋشىلىق تانىتىپ، ونەركاسىپ سالاسىن دامىتۋعا تىكەلەي ينۆەستيتسيا سالعانى ءۇشىن العىسىن ءبىلدىردى. سونداي-اق، ول جوبانى جۇزەگە اسىرۋدا، ونىڭ ىشىندە قاجەتتى ينفراقۇرىلىممەن قامتاماسىز ەتۋدە جان-جاقتى قولداۋ كورسەتۋگە دايىن ەكەنىن اتاپ ءوتتى. ءوز كەزەگىندە شەتەلدىك ينۆەستورلار بۇگىندە شىمكەنتتە ينۆەستيتسيا تارتۋعا بارلىق جاعداي جاسالعانىنا توقتالدى. زاۋىت ىسكە قوسىلسا، باسقا دا بىرقاتار جوبالاردى جۇزەگە اسىرۋ جوسپارلانىپ وتىر.
ايتا كەتەيىك، Fujian Hengwang Investment Co.، Ltd كومپانياسى بولات ءوندىرىسى مەن حالىقارالىق ساۋدادا ۇلكەن تاجىريبەسى بار Jiangsu Coastal Steel Group Co.، Ltd ءىرى كورپوراتسياسىنىڭ بولىگى بولىپ تابىلادى.
ەستەرىڭىزگە سالا كەتەيىك، قالادا قۋاتتىلىعى 500 مۆت-قا دەيىن جەتەتىن كومبينيرلەنگەن تسيكلدى ستانسا سالۋ جوباسى دا جۇزەگە اسىرىلۋدا. قۇنى شامامەن 700 ميلليون اقش دوللارىن قۇرايتىن ينۆەستيتسيالىق جوبا تۇرعىنداردى ساپالى ەلەكتر جانە جىلۋ ەنەرگياسىمەن، سونداي-اق ىستىق سۋمەن قامتاماسىز ەتۋگە باعىتتالعان.
سونىمەن قاتار، ءىرى تۇرىك كومپانياسى Alarko Holding جاڭا فورماتتاعى جىلىجاي كەشەنىن سالۋدا. 650 ميلليون اقش دوللارىن قۇرايتىن ينۆەستيتسيالىق جوبا جالپى كولەمى 500 گەكتار اۋماقتا ەكى مىڭ جاڭا جۇمىس ورنىن كەزەڭ-كەزەڭمەن قۇرۋعا، ازىق-تۇلىك قاۋىپسىزدىگىن جانە جاڭا وندىرىستەردى ەنگىزۋ ارقىلى جىلىجاي بيزنەسىن دامىتۋعا ىقپال ەتەدى.
