حالىقارالىق «قازاق ءتىلى» قوعامى جانە قر وقۋ-اعارتۋ مينيسترلىگىنىڭ باستاماسىمەن اقمولا وبلىسىنىڭ اكىمدىگى بىرلەسە ۇيىمداستىرعان فورۋمعا استانا جانە الماتى قالالارىنان ەلىمىزگە بەلگىلى عالىمدار، قوعام قايراتكەرلەرى جانە جەرگىلىكتى جوعارى وقۋ ورىندارىنىڭ عالىمدارى قاتىستى.
شارادا حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحانۇلى، حالىقارالىق «قازاق ءتىلى» قوعامىنىڭ عىلىم جانە ءبىلىم ماسەلەلەرى جونىندەگى ۆيتسە-پرەزيدەنتى، قر ۇعا اكادەميگى، فيلولوگيا عىلىمىنىڭ دوكتورى، پروفەسسور شەرۋباي قۇرمانبايۇلى، احمەت بايتۇرسىنۇلى اتىنداعى ءتىل ءبىلىمى ينستيتۋتى ديرەكتورىنىڭ ورىنباسارى، فيلولوگيا عىلىمىنىڭ دوكتورى، پروفەسسور كۇدەرينوۆا قۇرالاي بيمولداقىزى، «نازارباەۆ زياتكەرلىك مەكتەپتەرى» دببۇ-نىڭ «ءبىلىم بەرۋ باعدارلامالارى ورتالىعى» فيليالىنىڭ ساراپشىسى بايتەنوۆا قالامقاس قيدىربەكقىزى، سونىمەن قاتار، كوكشەتاۋ قالاسىنان №4 وبلىستىق مامانداندىرىلعان مەكتەپ ليتسەي ينتەرناتىنىڭ قازاق ءتىلى مۇعالىمى جاكيشەۆا ايمان تىلەۋتىسقىزى بايانداما جاسادى.
«ءپاتريوتيزمدى قالىپتاستىرۋ جانە قازاق ءتىلىنىڭ دەڭگەيىن كوتەرۋ ءۇشىن فيلولوگ مۇعالىمدەر مەن مەكتەپكە دەيىنگى ءبىلىم بەرۋ مەكەمەلەرىنىڭ تاربيەشىلەرىنىڭ ءرولى وتە ماڭىزدى. ءتىلدىڭ بولاشاعى ءىشىنارا وسى ماماندارعا بايلانىستى، ولارعا ەرەكشە ءمان بەرىپ، كاسىبيلىكتى دامىتۋ ءۇشىن جاعداي جاساۋ كەرەك. تىلدىك ءبىلىم بەرۋ ساپاسىن جاڭا دەڭگەيگە كوتەرۋ قاجەت. بۇگىن ءار وڭىردەن كەلگەن ارىپتەستەر جينالدى، ءبىزدىڭ بارلىعىمىزدىڭ ءبىر ماقساتىمىز بار، ول انا ءتىلىنىڭ ساپاسىن جاقسارتۋ جانە اۋقىمىن كەڭەيتۋ. مەملەكەت باسشىسى وسى سالاعا ەرەكشە نازار اۋدارىپ وتىر. سول سەبەپتى، ءبىز ەلىمىزدىڭ بارلىق وبلىستارىندا وسىنداي فورۋمدار وتكىزۋدى ۇيعاردىق. اقمولا وبلىسى وسىنداي اۋقىمدى ءىس-شارا وتكىزىلەتىن ءبىرىنشى بولدى، ونى پرەزيدەنت اكىمشىلىگى قولدادى. مەن مەملەكەتتىك ءتىل ماسەلەلەرىنە بەي – جاي قارامايتىن بارلىق اقمولالىقتارعا زور العىسىمدى بىلدىرەمىن»، - دەدى راۋان كەنجەحانۇلى.
حالىقارالىق «قازاق ءتىلى» قوعامىنىڭ نەگىزگى جۇمىس باعىتتارىنىڭ ءبىرى – قازاق ءتىلى مەن ادەبيەتى ءپانى مۇعالىمدەرىنە ادىستەمەلىك قولداۋ كورسەتۋ. وسى ماقساتتا ەلىمىزدىڭ ءىرى وبلىستارى مەن قالالارىندا قازاق ءتىلى مەن ادەبيەتى ءپانى مۇعالىمدەرىنىڭ ايماقتىق فورۋمى ۇيىمداستىرىلادى. سونداي شارانىڭ ءبىرى – اقمولا وبلىسى مۇعالىمدەرى مەن ءبىلىم سالاسى ماماندارى اراسىندا ءوتتى. مۇعالىمدەردىڭ كاسىبي بىلىكتىلىگىن ارتتىرۋعا باعىتتالعان ورتاق الاڭ – قاۋىمداستىق قۇرىلدى.
فورۋم قازاق ءتىلى مەن ادەبيەتى ءپانى مۇعالىمدەرىنىڭ كاسىبي بىلىكتىلىگىن، وقىتۋ ادىستەمەسىن جەتىلدىرۋ، مۇعالىمدەردىڭ شىعارماشىلىق الەۋەتىن دامىتۋ جانە پەداگوگيكالىق شەبەرلىگىن دامىتۋ ماقساتىندا وتكىزىلدى. فورۋمدا قازاق ءتىلى مەن ادەبيەتى باعىتى بويىنشا عىلىمي جانە ادىستەمەلىك ماسەلەلەر، پراكتيكالىق قۇرالداردى قولدانۋ، قازاق تىلىندەگى وقۋشىلاردىڭ وقۋ ساۋاتتىلىعى مەن اكادەميالىق جازۋ مادەنيەتىن دامىتۋ، مۇعالىمدەردىڭ كاسىبي داعدىلارىن جەتىلدىرۋ، شىعارماشىل، ۇزدىك مۇعالىمدەردى انىقتاپ، ولارعا قولداۋ كورسەتۋ، ىنتالاندىرۋ، تاجىريبەسىن تاراتۋ، قولداۋ ماسەلەلەرى تالقىلاندى.
شارانىڭ نەگىزگى ءبولىمى «بولاشاق» سارايىندا باستالىپ، كەيىننەن ش.ءۋاليحانوۆ اتىنداعى كوكشەتاۋ ۋنيۆەرسيتەتىندە شەبەرلىك ساعاتتارىمەن ۇلاستى.
