اقمولا وبلىسىنىڭ اكىمى مارات احمەتجانوۆ قازاقستان حالقىنىڭ بىرلىگى كۇنىنە ارنالعان سالتاناتتى ءىس-شاراعا قاتىسىپ، وندا كوكتەمگى سۋ تاسقىنىڭ سالدارىن جويۋعا اتسالىسقان ءبىر توپ اقمولالىقتى ماراپاتتادى.
اقمولا وبلىسى اكىمى ءباسپاسوز قىزمەتىنىڭ مالىمەتىنشە، بيىلعى جىلى وڭىردەگى بىرلىك مەرەكەسى سۋ تاسقىنىنان كەيىنگى جاعداي اياسىندا قارسى الىنىپ وتىر. حالىقتىڭ بىرلىگى ارقاسىندا سۋ تاسقىنىنا قارسى كۇرەستە بىردە-ءبىر اقمولالىق كومەك پەن نازاردان تىس قالمادى.
مەرەكەلىك شارادا ءورت سوندىرۋشىلەر، قۇتقارۋشىلار، پوليتسيا قىزمەتكەرلەرى، ەرىكتىلەر، كاسىپكەرلەر، مەديتسينا قىزمەتكەرلەرىنە قۇرمەت كورسەتىلدى.
سالتاناتتى جيىندا وبلىس باسشىسى بارلىق قاتىسۋشىلاردى كەلە جاتقان مەرەكەمەن قۇتتىقتاپ، كۇن سايىن ەلىمىزدەگى كەلىسىم، بىرلىك پەن بەيبىتشىلىكتى ساقتاۋعا ءوز ۇلەستەرىن قوساتىن بارلىق اقمولالىقتارعا العىسىن ءبىلدىردى.
«قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» 33-ءشى سەسسياسىندا مەملەكەت باسشىسى قازاقستان حالقى اسسامبلەياسىنىڭ قوعامدىق سانانى جاڭعىرتۋعا قاتىسۋداعى ءرولىن اتاپ ءوتىپ، رەسپۋبليكاداعى تۇراقتىلىقتى، ەتنوسارالىق جانە كونفەسسياارالىق كەلىسىمدى نىعايتۋ، قازاقستان حالقىنىڭ ۇلتتىق بىرەگەيلىگى مەن بىرلىگىن نىعايتۋ بويىنشا بىرقاتار جاڭا مىندەتتەر قويدى. بىرنەشە اپتا بويى قۇتقارۋشىلار، پوليتسيا قىزمەتكەرلەرى، اسكەريلەر، ەرىكتىلەر، مەديتسينا قىزمەتكەرلەرى جانە باسقالار كۇندىز-ءتۇنى قيىن جاعدايدا جەرلەستەرىنە كومەكتەسۋ ءۇشىن ايانباي ەڭبەك ەتتى. قيىن كەزدە وبلىستىڭ ءاربىر تۇرعىنى بىرلىكتىڭ، جاناشىرلىقتىڭ جانە ءبىر بىرىنە دەگەن قامقورلىقتىڭ جارقىن ۇلگىسىن كورسەتە ءبىلدى»، - دەدى مارات احمەتجانوۆ.
سالتاناتتى شارادا ءوڭىردىڭ قوعامدىق-ساياسي ومىرىنە، سونداي-اق سۋ تاسقىنى كەزەڭىندە جانە قوعامدىق كەلىسىمدى نىعايتۋدا ءوز ۇلەستەرىن قوسقان ءىس-شاراعا قاتىسۋشىلار ماراپاتتالدى.
ەرەسەكتەرمەن بىرگە سۋ تاسقىنى سالدارىن جويۋ شارالارىنا وسكەلەڭ ۇرپاق وكىلدەرى دە ءوز ۇلەستەرىن قوستى. ماسەلەن، بۇلاندى اۋدانىنداعى «بالدىرعان» بالاباقشاسىنىڭ تاربيەلەنۋشىسى اباي اعزام ءوزىنىڭ جاسىنا قاراماستان اۋداندىق شتابتا گۋمانيتارلىق كومەك جيناۋعا ۇلەس قوستى.
اقمولا وبلىسى تجد اقكول قالاسىنداعى №26 ءورت ءسوندىرۋ ءبولىمىنىڭ قىزمەتكەرى، ءورت ءسوندىرۋ كولىگىنىڭ جۇرگىزۋشىسى اعا سەرجانت دانيار اڭساريەۆ ءورت بريگاداسىنىڭ قۇرامىندا سۋ تاسقىنى جاعدايىن جويۋ ءۇشىن ارشالى اۋدانىنىڭ جىبەك جولى اۋىلىنا جىبەرىلدى. جەرگىلىكتى اتقارۋشى ورگاندارمەن بىرلەسىپ بارلىق كەزەڭدە 2 مىڭنان استام قاپ تاسىمالداندى جانە ەلدى مەكەندەرگە ازىق-تۇلىك پەن ءدارى-دارمەك جەتكىزىلدى. ەرىگەن قار سۋىن سورۋ بويىنشا جۇمىستار جۇرگىزىلىپ، بوگەتتەر نىعايتىلدى.
جيىن سوڭىندا كوكشەتاۋداعى سۋ تاسقىنىنان زارداپ شەككەن شيلوۆتار مەن سارسەنباەۆتار وتباسىلارىنا پاتەر كىلتى تابىس ەتىلدى. جالپى، وبلىس ورتالىعىندا بارلىعى 14 وتباسى باسپانالى بولدى.
