بۇگىن مايقۇدىق ساياباعىنا 1100 جاس اعاش ەگىلدى. دەمالىس ورنىندا الما، شەتەن، مامىرگۇل، مويىل، قاراعان، قاراعاي، تەرەك، ۇساق جاپىراقتى قاراعاش وسىرىلەدى.
قوعامدىق اۋماقتى اباتتاندىرۋعا جەرگىلىكتى تۇرعىندار، مەملەكەتتىك قىزمەتكەرلەر، شاعىن جانە ورتا بيزنەس وكىلدەرى كەلدى.
اعاش ەگۋگە قاراعاندى وبلىسىنىڭ اكىمى ەرماعانبەت بولەكپاەۆ تا قاتىستى.
– پرەزيدەنتتىڭ باستاماسىمەن ەلىمىزدە "تازا قازاقستان" ەكولوگيالىق اكتسياسى باستالدى. بۇل ءبىر كۇندىك اكتسيا ەمەس، ول ۇزاق مەرزىمگە سوزىلماق. وبلىسىمىزدىڭ تۇرعىندارى اۋماقتاردى تازالاۋعا، كوگالداندىرۋعا بەلسەندى قاتىسىپ جاتىر. ايماقتا بارلىق اۋداندار مەن قالالاردا اعاش ەگۋ ءجۇرىپ جاتىر. بۇل جۇمىس ءالى دە جالعاسادى. تەك قاراعاندى بويىنشا 90 مىڭنان استام اعاش ەگىلەدى. كيرزاۆود اۋدانىندا ورمان القابىن قالپىنا كەلتىرۋ جوسپارلانعان. بەلسەندىلىك تانىتقاندارىڭىز ءۇشىن بارشاڭىزعا راحمەت! – دەپ ءوڭىر باسشىسى تۇرعىندارعا العىسىن ءبىلدىردى.
بۇقارا بىرىگىپ جاسالىپ جاستقان جۇمىسقا ءاليحان بوكەيحان اۋدانى مەكتەپتەرىنىڭ ديرەكتورلارى ءوز ۇلەسىن قوستى.
– كوكتەمنىڭ باستالۋىمەن بىزدە قالا مەن وبلىس بويىنشا ءاردايىم سەنبىلىكتەر وتەدى. ءىز دە ول شارالاردان شەتتە قالا المايمىز. بۇگىن ءبىز ديرەكتورلار كورپۋسىمەن ساياباقتا اعاش ەگەمىز، ال اتا-انالار قاۋىمى، مۇعالىمدەر مەن وقۋشىلار مەكتەپ اۋماعىن كوگالداندىرۋمەن اينالىسادى. بارلىق اعاشتار تامىر جايىپ، قالامىزدىڭ تۇرعىندارىن قۋانتادى دەپ ۇمىتتەنەمىز، – دەدى № 85 مەكتەپ ديرەكتورى سالتانات تۇرسىنوۆا.
ەرەسەكتەرمەن بىرگە بالالار دا اعاش ەكتى.
– مەن ءبىزدىڭ ساياباقتىڭ تازا، جاقسى جانە ادەمى بولعانىن قالايمىن. اعاممەن بىرگە كەلدىم. ەرەسەكتەرگە كومەكتەستىم، كوشەتتەر ەككەن شۇڭقىرلارعا توپىراق سالىپ وتىردىم. ءوزىم ءبىر اعاش ەكتىم. مەن ساياباققا ءجيى بارىپ، ونىڭ قالاي ءوسىپ جاتقانىن كباقىلاپ وتىرامىن، – دەيدى 7 جاسار ارسەني وبەرت.
وسى جىلدىڭ كوكتەمىندە ءاليحان بوكەيحان اۋدانىنا 10 مىڭنان استام ءتۇرلى اعاش ەگىلەدى.
سونداي-اق، بۇگىن قاراعاندىدا اۋەجاي اۋدانىندا 1000 پيراميدالىق تەرەك ەگىلدى. بۇل اعاشتار اللەرگياسى بار ادامدار ءۇشىن قاۋىپسىز بولىپ سانالادى.
اكتسياعا 300-دەن استام ادام – اكىمدىك وكىلدەرى، دەپۋتاتتار، ەكولوگيالىق قوزعالىس ەرىكتىلەرى، قارۋ ستۋدەنتتەرى، قاراعاندى اكادەمياسىنىڭ كۋرسانتتارى جانە ت. ب. قاتىستى.
اعاش ەگۋ "تازا قازاقستان" رەسپۋبليكالىق ەكولوگيالىق اكتسياسى اياسىندا ءوتتى. بولاشاقتا كوشەتتەرگە كۇتىم جاسالادى.
