«قازمۇنايگاز» ۇك اق ءوزىنىڭ قىزمەتىن جۇرگىزەتىن وڭىرلەردە الەۋمەتتىك تۇراقتىلىقتى ساقتاۋ ماقساتىندا ماڭعىستاۋ وبلىسىنىڭ اكىمدىگىمەن جانە «تاتنەفت» جاق-پەن بىرلەسىپ، ايماقتاعى جۇمىسسىز ازاماتتاردى تاتارستان رەسپۋبليكاسىنداعى تاتنەفت جوبالارىنا ەڭبەككە تارتۋ جونىندەگى جۇمىسىن جالعاستىرۋدا.
تاتنەفت وكىلدەرى ماڭعىستاۋ ءوڭىرىنىڭ، سونىڭ ىشىندە جاڭاوزەن قالاسىنىڭ تۇرعىندارىمەن كەزدەسۋ وتكىزدى. جينالعاندارعا بوس ورىندار تۋرالى ايتىلىپ، ەڭبەك جاعدايلارى ءتۇسىندىرىلدى.
تاتنەفت كومپانياسى 500-گە تارتا ادامدى جۇمىسپەن قامتۋعا دايىن، سونىڭ ىشىندە ۇڭعىمالاردى پايدالانۋ جانە بارلاۋ، كۇردەلى جوندەۋ بۇرعىشىلارى، بۇرعىشىنىڭ كومەكشىلەرى، ماشينيست، سلەسار، ەلەكتر دانەكەرلەۋشى، كولىك جۇرگىزۋشى جانە باسقا دا مامانداردى جۇمىسقا قابىلدايدى.
سونىمەن قاتار تاتنەفت كومپانياسى ورال جانە اقتوبە قالالارىنان جۇمىس ورنىنا دەيىن كولىكپەن جەتكىزەدى، جاتاقحانا بەرەدى، قاجەتتى وقىتۋ جانە قايتا وقىتۋ جۇرگىزەدى.
جۇمىسشىلارعا ۆاحتا ادىسىمەن جۇمىس ىستەۋ ۇسىنىلىپ وتىر. ءبىر اي جۇمىس ىستەپ، ءبىر اي دەمالادى. بۇل رەتتە جۇمىسشىلارعا لايىقتى جالاقى دا تولەنەدى. ايتالىق، ۇڭعىمانى بۇرعىلاۋ جانە كۇردەلى جوندەۋ سالاسىنداعى ورتاشا ەڭبەكاقى 78,5 مىڭ رۋبل، مەحانيكالىق جابدىقتى جوندەۋ سالاسىندا – 52,5 مىڭ رۋبل، ال كولىك جۇرگىزۋشىلەردىڭ جالاقىسى 55 مىڭ ءرۋبلدى قۇرايدى. ورتاشا جالاقى كولەمىندە ۆاحتادا بولاتىن كەزەڭدەگى جانە ۆاحتاارالىق دەمالىسقا بەرىلەتىن جالاقى قوسا ەسەپتەلگەن.
بۇگىندە ماڭعىستاۋ وبلىسىنا قاراستى اۋداندار مەن قالالاردان 500-دەن اسا ۇمىتكەر ءوتىنىش بەردى. ونىڭ 178 ادامى ىرىكتەۋدەن ءوتتى.
جۇمىسسىز ازاماتتاردان ءوتىنىش قابىلداۋ ءالى دە جالعاسۋدا. ماڭعىستاۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى بەرگەن اقپاراتى بويىنشا تاعى 170 ادام جۇمىس ورنالاسۋعا نيەت ءبىلدىردى. ەندى شىلدە ايىنىڭ ورتاسىندا ۇمىتكەرلەردى ىرىكتەۋدىڭ ەكىنشى كەزەڭى وتەدى.
تاتنەفت وكىلدەرى ۇمىتكەرلەردى ىرىكتەۋ جانە تەستىلەۋدى اقتاۋ قالاسىندا وتكىزەدى.
بۇل ۇلتتىق كومپانيانىڭ وڭىردەگى الەۋمەتتىك تۇراقتىلىقتى ساقتاۋ باعىتىنداعى جالعىز باستاماسى ەمەس ەكەنىن ايتا كەتۋ كەرەك. قازىرگى ۋاقىتتا ماڭعىستاۋ وبلىسىن الەۋمەتتىك-ەكونوميكالىق دامىتۋدىڭ 2021-2025 جىلدارعا ارنالعان كەشەندى جوسپارى اياسىندا ۇلتتىق كومپانيانىڭ قاتىسۋىمەن وڭىردە 425 ملرد تەڭگە سوماسىنا ەسەپتەلگەن 22 جوبا مەن ءىس-شارا جوسپارلانعان. بۇل كاسىپورىندار توبى مەن ولاردىڭ مەردىگەر ۇيىمدارىندا الەۋمەتتىك تۇراقتىلىقتى ساقتاۋ، ينۆەستيتسيالىق جوبالاردى ىسكە اسىرۋ، جاڭا جۇمىس ورىندارىن اشۋ، سونداي-اق الەۋمەتتىك جوبالاردى قارجىلاندىرۋ شارالارىن قامتيدى.
