بۇگىن سىربويىلىقتار 1 مامىر – قازاقستان حالقىنىڭ بىرلىگى كۇنىن زور ىقىلاسپەن، ءسان-سالتاناتىمەن قارسى الدى. ورتالىق الاڭنان باستاۋ العان دۋماندى ءىس-شارادا ءتۇرلى ۇلت وكىلدەرىنىڭ ءانى مەن ءبيى، سالتى مەن ءداستۇرى قاتار ءوربىپ، مىزعىماس بىرلىكتىڭ ايقىن كورىنىسى سەزىلدى، دەپ جازادى "ادىرنا" ۇلتتىق پورتالى.
ورتالىق اۋماعى مەرەكەلىك نىشاندى سيپاتتايتىن اتريبۋتتارمەن ارلەنىپ، اۋە شارى مەن جەر شارى بىرلىكتىڭ سيمۆولىن ايشىقتادى. مەرەكەدە وبلىس اكىمى نۇرلىبەك نالىباەۆ سىر حالقىن بىرلىك كۇنىمەن قۇتتىقتاپ، اقجارما تىلەگىن ارناپ، تۇرعىنداردى تاۋەلسىزدىك، تاتۋلىق پەن تۇراقتىلىق سىندى باعا جەتپەس قۇندىلىقتاردى ساقتاۋعا شاقىردى.
- بىرلىگى جاراسقان ەلدىڭ تىرلىگى دە تورگە وزادى. بۇگىنگى تاڭدا ۇلى ماقساتتاردى ۇلىقتاپ، دوستىققا قۇشاعىن ايقارا اشقان قازاقستان زاماناۋي الەمدە ەل پرەزيدەنتى قاسىم-جومارت كەمەلۇلىمەن بىرگە دامۋدىڭ جاڭا كوشىن باستادى. بەرەكەلى بىرلىگىمىز بەن تاتۋ تىرلىگىمىزدىڭ ارقاسىندا سەرپىندى ىستەرىمىز ناتيجەلى بولىپ، ءوڭىرىمىز جاڭا دەڭگەيگە كوتەرىلىپ، ەلىمىزدىڭ ىرگەلى وبلىستارىنىڭ قاتارىنان كورىنەدى دەپ سەنەمىن. جۇدىرىقتاي جۇمىلعان اۋىزبىرشىلىكپەن ورتاق مۇددە جولىنداعى قيىندىقتاردى قايىسپاي كوتەرىپ، قۋانىشىمىزدى ءبولىسىپ، اق نيەتىمىزدى، اسىل قاسيەتتەرىمىزدى تانىتىپ كەلەمىز. بۇل - ءتىلى باسقا بولسا دا، تىلەگى ءبىر، ءجۇزى باسقا بولسا دا، جۇرەگى ءبىر جۇرتىمىزدىڭ اينىماس بىرلىگىنىڭ شەكسىز دالەلى. ءبىزدىڭ كۇشىمىز – بولاتتاي بەرىك بىرلىكتە!،-دەدى وبلىس اكىمى.
ورتالىق الاڭداعى نەگىزگى شارا كونتسەرتتىك باعدارلاماعا ۇلاستى. دۋماندى مەرەكەدە قازاق ەستراداسىنىڭ جارقىن جۇلدىزى سەرىك يبراگيموۆ سىر ەلىنە مەرەكەلىك ءان-شاشۋىن الىپ كەلدى. سونداي-اق، وزگە دە تانىمال ونەر يەلەرى كورەرمەن كوڭىل-كۇيىن كوتەرىپ، ەلگە قۋانىش سىيلادى.
مۇنان كەيىن وبلىس اكىمى ەلمەن بىرگە ءتۇرلى ۇلت وكىلدەرىنىڭ قولونەر بۇيىمدارى قويىلعان كورمەنى ارالاپ، بالالار شىعارماشىلىعىن توپتاستىرعان شاعىن قويىلىمدى كورىپ، ءتۇرلى سپورتتىق ويىنداردى تاماشالادى.
"ادىرنا" ۇلتتىق پورتالى
