Qazaqstandyq seısmologtar Atyraý oblysy aýmaǵynda jer silkinisin tirkedi, dep habarlaıdy “Adyrna” ulttyq portaly.
Qazaqstan Ulttyq derekter ortalyǵynyń jedel málimeti boıynsha, jerasty dúmpýleri 10 sáýir kúni saǵat 01:40-ta (Astana ýaqytymen) tirkelgen. Jerasty qozǵalysynyń epıentri Kulsary qalasynan ońtústik-shyǵysqa qaraı 120 shaqyrym jerde ornalasqan.
Seısmıkalyq dúmpýdiń magnıtýdasy — 4,3; energetıkalyq klasy — 9,1 bolǵan.
Ázirge zardap shekkender men qıraǵan nysandar týraly aqparat túsken joq.
Aıta keteıik, buǵan deıin 28 naýryzǵa qaraǵan túni Jambyl oblysynyń birneshe aýdanynda jer silkinisi tirkelip, Merke aýylynda 5 baldyq, Kúlan aýylynda 4 baldyq, al Taraz, Shý, Qordaı jáne Moıynqum aýdandarynda 2 baldyq dúmpýler baıqalǵan edi.
Sol kúni tústen keıin taǵy bir jerasty qozǵalysy oryn alǵan. Eýropalyq Jerorta teńizi seısmologııalyq ortalyǵynyń deregi boıynsha, magnıtýdasy 5,0 jer silkinisi Merke aýylynan ońtústik-batysqa qaraı 20 shaqyrym jerde tirkeldi.
Jambyl oblysynda bolǵan qos silkinistiń saldarynan eki aýdannyń 20-dan astam nysanyna zaqym kelgen bolatyn. Qazir óńirde seısmıkalyq ahýaldy baqylaý jáne taldaý jumystary jalǵasyp jatyr.
