Premer-mınıstrdiń jańa orynbasary Atyraý oblysynan onlaın brıfıng ótkizdi, dep habarlaıdy "Adyrna" tilshisi.
Qanat Bozymbaev óńirdegi ahýal jaıly baıandady.
«Jaıyq ózeni deńgeıiniń kóterilýne baılanysty, Aqtóbe oblysynan Elek ózeniniń sýyn eseptegende, oǵan qosa Irıklı (Reseı) sý qoımasynan kóbirek sýdyń kelýine baılanysty óńirde áli de sý tasqyny qaýpi joǵary. Bul edáýir úlken táýekelder. Men ákimdik pen jergilikti atqarýshy organdarǵa Jaıyq ózeninde sýdyń tasýyna baılanysty boljaý jumystaryn eki kún ishinde ázirleýdi tapsyrdym. Biz Jaıyq ózeniniń deńgeıi edáýir kóteriledi dep kútip otyrmyz. Reseı shekarasynan sýdyń jetýi shamamen ádette 20-25 kúnde keletin. Biraq bul joly 15-20 kúnniń ishinde jetýi múmkin», - deıdi Bozymbaev.
Úkimet basshysy Oljas Bektenov sý tasqyny bolǵan óńirlerde aýyz sýdyń sapasy men epızootııalyq jaǵdaıǵa baqylaýdy kúsheıtýdi tapsyrdy.
- Densaýlyq saqtaý mınıstrligi sý basqan aımaqtardaǵy sanıtarııalyq-epıdemıologııalyq jaǵdaıdy, atap aıtqanda, aýyz sýdyń sapasyn baqylaýdy kúsheıtýi kerek;
- Aýyl sharýashylyǵy mınıstrligi epızootııalyq jaǵdaıdyń nasharlaýyna jol bermeı, úı jáne jabaıy janýarlarǵa qajetti veterınarııalyq baqylaýdy qamtamasyz etýge tıis;
- Ishki ister mınıstrligi evakýaııalanǵan halyqtyń múlkiniń saqtalýyn qamtamasyz etý jóninde sharalar qabyldaýy qajet;
- ákimdikter evakýaııalyq pýnktterdegi halyqty qajetti zattardyń barlyǵymen qamtamasyz etip, sondaı-aq qalpyna keltirý jumystary kezeńinde olardy ýaqytsha ornalastyrý máselesin pysyqtaýy qajet.
