Дүйсенбі күнгі сауда барысында Brent маркалы мұнай фьючерстері шамамен 20%-ға қымбаттап, барреліне 111 доллардан асты. Бұл көрсеткіш 2022 жылдың шілдесінен бергі ең жоғары деңгей болып отыр, деп хабарлайды “Адырна”.
Сарапшылардың айтуынша, бағаның күрт өсуіне АҚШ, Израиль және Иран арасындағы шиеленістің күшеюі әсер еткен. Сондай-ақ Ормуз бұғазы арқылы мұнай тасымалының бұзылуы мүмкін деген қауіп те нарыққа қысым жасап отыр. Аталған бұғаз арқылы әлемдік мұнай жеткізілімінің шамамен бестен бір бөлігі өтеді.
Сонымен қатар West Texas Intermediate (WTI) мұнайының бағасы 106–111 доллар аралығына дейін көтерілді.
Өткен аптада Brent мұнайы 27%-ға, ал WTI 35%-дан астамға қымбаттаған. Сарапшылар Таяу Шығыстағы жағдай ушыға түссе, әлем бойынша жанармай бағасы тағы да өсуі мүмкін екенін ескертеді.
Айта кетейік, мұнайдың ірі экспорттаушысы Сауд Арабиясы Қызыл теңіз арқылы жеткізілім көлемін арттыруға тырысып жатыр. Алайда бұл көлемдер Ормуз бұғазы арқылы тасымалдың ықтимал қысқаруын толық өтей алмайды.
