11 ақпан күні Алматыдағы Green Recycle қоқыс өңдеу кәсіпорны аумағында қоқыс сұрыптау кезінде әйел адамның бөлшектелген денесі табылды, деп хабарлайды "Адырна" ұлттық порталы.
Деректерге сүйенсек, марқұм 36 жаста болған. Тергеу барысында 9 ақпанда Әлмерек ықшамауданында жалға алынған үйде әйел мен оның азаматтық некедегі күйеуі арасында спирттік ішімдік ішу кезінде жанжал болғаны анықталды. Соның салдарынан ер адам әйелге бірнеше рет пышақ жарақатын салып, кейін денесін бөлшектеп, қоқыс контейнеріне тастаған.
Алматы қалалық полиция департаментінің баспасөз қызметі адам өлтіру фактісі бойынша Түрксіб ауданы полиция басқармасында қылмыстық іс қозғалғанын хабарлады.
"Күдікті ұсталып, уақытша ұстау изоляторына қамалды. Алдын ала мәлімет бойынша, ер адам бірге ішімдік ішу барысында жанжал шығып, азаматтық некедегі әйелін өлтірген. Өзге мән-жайлар анықталуда", – деп мәлімдеді полиция өкілдері.
