Қалалық №1 клиникалық аурухана су жаңа құрылғымен жабдықталды

274

Шымкенттегі қалалық №1 клиникалық ауруханасында Тәуелсіздік мекересі қарсаңында АҚШ-тан әкелінген компьютерлік томография құрылғысы іске қосылды.
Ем-дом көрсету мекемесінде ашылған компьютерлік томография кабинетімен танысқан шаһардың бас дәрігері Бақытжан Позилов аппарат инсульт алған науқастың диагнозын дер кезінде анықтауға мүмкіндік беретінін жеткізді.

– Бұл жеке инвестордың есебінен алынған құрылғы. Қаладағы медициналық орталықтарда 21 компьютерлік томография болған. Көбі жекеменшік медорталықтарда орналасқан. Ал жаңа аппарат соңғы үлгідегі технологиямен жабдықталған. Қалалық №1 клиникалық ауруханасына тәулігіне орташа есеппен 200-ге жуық науқас түседі. Кейде жедел медициналық көмекке жүгінген науқастарға зерттеу жүргізуде аталған құрылғының пайдасы зор. Әсіресе, ишемиялық инсульт алған науқастың диагнозын дер кезінде анықтауға септігін тигізеді. Ел Тәуелсіздігінің 30 жылдық мерекесінде осындай құрылғы ел игілігіне беріліп отыр. Ауруханаға келген науқастар компьютерлік томографияға тегін түсіріледі, - деді Бақытжан Жолдасбекұлы.

Жалпы, компьютерлік томография ағзаның барлық мүшелері мен жүйелеріне зерттеу жүргізуге мүмкіндік береді. Қарама-қарсы түстерді қолданып, бағдарламаның арнайы пакеттерін қосу арқылы жүрек қан тамырларының зақымдану деңгейін байқауға, сүйек тіндерінің минералды тығыздығын анықтауға жағдай жасайды.

Азамат ЖАППАР,
Фото Серік ҚОСАЕВ

Пікірлер
Редакция таңдауы
Серіктестер/Партнеры
Студия IMA - создание сайтов Доставка цветов Астана - Lova Buket