Білім және ғылым министрлігі оқушылардың жаңа оқу жылында қалай демалатынын мәлімдеді. «Орта білім беру ұйымдарында 2021 – 2022 оқу жылының басталуын, ұзақтығын және каникул кезеңдерін айқындау туралы» бұйрық Ашық НҚА порталында жарияланды, деп хабарлайды «Адырна» тілшісі.
«Меншік нысанына және ведомстволық бағыныстылығына қарамастан орта білім беру ұйымдарында 2021 - 2022 оқу жылының басталуы, ұзақтығы және каникулы кезеңдерінің мынадай мерзімдері айқындалсын:
1) 2021 - 2022 оқу жылының басталуы - 2021 жылғы 1 қыркүйек;
2) оқу жылының ұзақтығы 1-сыныптарда – 33 оқу аптасы, 2-11 (12)- сыныптарда – 34 оқу аптасы. Мейрам күндеріне түскен сабақтар оқу бағдарламасы мазмұнының кіріктірілуі ескеріле отырып, қайталауға арналған сағаттар есебінен келесі жұмыс күндеріне ауыстырылады»,–делінген хабарламада.
Оқу жылы ішіндегі каникул кезеңдері:
1-11 (12) – сыныптарда: күзгі каникул – 7 күн (2021 жылғы 25-31 қазан аралығында), қысқы – 11 күн (2021 жылғы 31 желтоқсан мен 2022 жылғы 10 қаңтар аралығында), көктемгі – 11 күн (2022 жылғы 21-31 наурыз аралығында);
1-сыныптарда қосымша каникул 7 күн (2022 жылғы 7-13 ақпан аралығында) болады.
«Адырна» ұлттық порталы