Төтенше жағдай кезіндегі жұмыссыз қалған азаматтарға төленген әлеуметтік көмек енді карантин күшейтілсе де төленбейді. Еңбек және халықты әлеуметтік қорғау министрі Біржан Нұрымбетов карантин күшейтілгеннен кейін 42 500 теңгенің төлену-төленбеуіне қатысты пікір білдірді.
Министр төтенше жағдай кезінде 42 500 теңге төлеуге мемлекеттен біраз қаражат жұмсалғанын айтты. Бірақ қаржы бюджеттен емес, мемлекеттік әлеуметтік сақтандыру қорының активтерін сату есебінен түскен. Төтенше жағдай кезінде 322 миллиард теңге жұмсалып, 4 млн 607 мың адам 42500 теңге алған. 8 миллионнан астам адам өтініш берген.
– Енді 42 500 теңге төленбейді. Оны жоспарлап отырған жоқпыз. 42 500 теңгелік көмекті 4 миллион 607 мың адам алды. Қазір қордың қаржылық мүмкіндігі шектеулі. Дегенмен, жағдайға қарай қажеттілік болса, басқа қаржы көздері табылатын шығар, - деді министр орталық коммуникациялар қызметіндегі брифинг барысында.
"Адырна" ұлттық порталы
