"Қош енді, қош бол, күрең күз..." (Видео)

2322

ҚР Еңбек сіңірген әртісі, «Құрмет» орденінің иегері, Қазақстан композиторлар одағының мүшесі, әнші, композитор Гүлнар Дәукенова қайтыс болды, деп хабарлайды adyrna.kzақ порталы.

Осынау қайғылы хабар жайында Қ. Қуанышбаев атындағы қазақ мемлекеттік академиялық драма театрының директоры, режиссер Асхат Маемиров facebook парақшасында жазды.

"Алашын өміршең әндерімен, көкейкесті күйлерімен тербеген әнші-композитор, Қвзақстанның еңбек сіңірген артисі, ҚР Композиторлар Одағының мүшесі ГҮЛНӘР ДАУКЕНОВА өмірден өтті.

Халық арасына кеңінен танылған "Сағындым сағым жылдар", "Күрең күз", "Қайран уақыт", "Шыңдағы шынарым-ай", "Мөлдір сезім" секілді көптеген әндердің авторы Гүлнар Даукенова әпкеміздің туындылары да, Өзінің жан дүниесі секілді шынайылыққа, сыршылдыққа, лиризмге толы болатын. Ширек ғасырдан астам уақыт ұлттық музыкамыздың қара шаңырағы - Құрманғазы оркестрінде еңбек етті.

Еліміз тәуелсіздігін алған тұста үлкен толғаныстан туған "Жасай бер, Қазақстаным!" күйі - көптеген оркестрлердің репертуарының алтын қорына енді. Елге деген махаббатын әнмен, күймен өрнектеген Гүлнар апа - өмірде кішілік пен кісілікті, адалдық пен мейірімді, адамгершілік асыл қасиеттерді ту етті.

Көптеген әндері - марқұм Мәдина Ералиева шығармашылығының бойтұмарына айналды. Халық артистері Н.Нүсіпжанов, Р.Рымбаева, М.Жүнісова және А.Қосанова, Г.Дәуірбаева, Т.Асар, М.Түсіпбаева, А.Иманбай, Г.Оразымбетова, А.Керімбекова, Мирас пен Құралай, "Жігіттер" квартеті, "Кешью" топтарының репетуарынан Г.Даукенованың әндері берік орын алды.

Өнер әлемінде өзіндік орны, өз биігі бар Гүлнар Даукенова - Үржардың қасиетті топырағынан түлеп ұшып, "Шығыстың Шынары" атанды. Гүлнар әпке - ақжарқын жеңгеміз еді, Ақжайық өңірінің сыйлы келіні еді. Тағдыр қосқан серігі - Донеділ Қажымов та елімізге танымал әнші-композитор, Қазақстанның еңбек сіңірген қайраткері. "Тас түскен жеріне ауыр",- дейді бабаларымыз, Донеділ ағамызға қайғырып көңіл айтамыз. Гүлнар жеңгемнің өмірінің мәні - туған бала-келіні Алмабек ініміз бен Гүлзина келінімізге барлық бауыр-жекжаттарына қайғырып көңіл айтамын!

Қош болыңыз, шыңдағы шынар сынды - Гүлнар әпке, Гүлнар жеңеше! Сағым жылдардың ішінде Сізді сағынған шақтарда, әр қазақтың жүрегінде Сіздің әндеріңіз жүретініне сенемін! Иманыңыз жолдас болсын, аяулы Гүлнар-Жеңеше, Гүлнар-Әпке!" деп көңіл айтты ол.

 

КҮРЕҢ КҮЗ

Әнін жазған: Г. Дәукенова

Сөзін жазған: М. Мақатаев

Күп-күрең менің реңім,

Қош енді, қош бол, күрең күн!

Жаз келер және жап-жасыл,

Жақсылық тағы тілермін.

Жадырап өмір сүрермін,

Қош енді, қош бол, күрең күз!

 

Қайырмасы:

Қош енді, қош бол, күрең күз

Күрең мұң саған жібердім.

Күлермін деп ем түнердің.

Білермін қалай, білермін.

 

Жыртылып жатыр күрең жер,

Күрең жер - тозған кілемдер.

Күрең тау анау, күрең бел,

Күрең бел - жиған кілемдер.

Жаз келер және жап-жасыл,

Жасауын жердің түгендер.

 

Қайырмасы:

Қош енді, қош бол, күрен күз!

Ақ қысты тездеп жібергіз.

Ак қыстай әппақ бір елміз,

Ширығып біраз жүрерміз.

Қош енді, қош бол, күрен күз,

Шынығып өмір сүрерміз.

 

Қайырмасы:

 

 

Фото: интернет желісінен

Пікірлер
Редакция таңдауы