Home » Жаңалықтар » Шыңқожа батырға ескерткіш орнатылды

Шыңқожа батырға ескерткіш орнатылды

Қазақстан Республикасы Тәуелсіздігінің 25 жылдығына орай, Шығыс Қазақстан облысы, Аягөз ауданының Нарын ауылдық округінде Шыңқожа батырға арналған ескерткіштің салтанатты ашылуы өтті.

Шыңқожа батыр Базарқұлұлы (1706 қазіргі Шығыс Қазақстан облысы Аягөз ауданы) – аға батыр. Шыңқожа батыр – найман ішіндегі қаракерей руының тума тармағынан шыққан. 1727 ж. Бұланты-Білеуті шайқасында жеке ерлігімен көзге түсіп, жас батыр атанған. 1730 ж. Аңырақай-Алакөл шайқасына, 1741 ж. Шыңғыстаудағы Шаған шайқасына қатысып, тума, тоқпақ, байғана руларынан құралған жасаққа басшылық еткен. 1752 – 1754 ж. Жетісу, Алтай, Тарбағатай өңірлерін жоңғарлардан азат ету жорықтарында дарынды қолбасшы ретінде ел құрметіне бөленді.
Шынқожаның батыр атағы алғаш шыққаны – Жонғардың «Аюқара» атанған Доба деген батырымен жекпе-жекке шығып, оны өлтірген кезі, ол кезде батыр 21 жаста екен. Осындан бастап талай шайқастарда ерен ерлігімен көзге түскен батырдың даңқы ел арасына кетеді. Қазақ-қырғыз арасында болған қақтығыста Шыңқожа қоршауда қалып, өз бармағын қылышпен шауып орап, сау қалған батырларға қазақ жерінде көмуге аманат ретінде тапсырған, өзі сол “Жайыл қырғыны” деп аталған шайқаста ерлікпен қаза табады. Шыңқожаның денесі қай жерде жерленгені белгісіз, ал бармағы осы Шынқожа ауылында Нарын өзеннің бойындағы төбеге көмілген.
Шынғожа батыр ескерткіші  Аякөз ауданының Шынғожа ауылында, Алматы – Өскемен автомобиль жолы бойында орналасқан. Шынғожа ауылының аты да – батырдың есімімен тікелей байланысты. Қазақтың хас батыры Шыңқожа Базарқұлұлының ескерткішін салтанатты ашылуына байланысты Нарын ауылдық округінің мәдениет үйінде «Шыңқожа батыр және Аягөз өңірінің әдеби- мәдени шежіресі» тақырыбында конференция өтті. Аягөз қаласының ипподромында қазақ үйлер тігіліп, құран бағыштап (ас беріліп), қазақтың ұлттық ойындары аударыспақ, теңге алу, қыз қуу, қазақ күресі, тоғыз құмалақ және үш санатта ат жарысы, құсбегілік, жамбы ату ойындары өтті.

 

Пікір жазу

Почта жарияланбайды. Таңдаулы өрісті толтырыңыз *

*

x

Check Also

Тоқаев Жапонияның премьер-министріне көңіл айтты

Қазақстан Президенті Жапонияның премьер-министрі Синдзо Абэге көңіл айту жеделхатын жолдады.  Мемлекет басшысы Қазақстан халқының және ...