Әл-Фараби атындағы Қазақ ұлттық университетінде жыл бойы өткізіліп келе жатқан «Ана тілі» аруы» байқауының қорытынды сынағы болды. Оған оқу орнының барлық факультеттерінен іріктеліп алынған 14 ару қатысты.
Байқау алдында сөз сөйлеген университеттің тіл және тәрбие жұмысы жөніндегі проректоры Шолпан Жаманбалаева мұндай шаралардың тәрбиелік, тағылымдық мәні зор екендігіне назар аударды.
Арулар «Таныстыру», «Поэзиялық композиция», «Сән үлгісі», «Сұрақ-жауап», «Өнерім – өнерім» тақырыптары бойынша сынға түсті. Айта кеткен жөн, байқауға қатысушылар бұл кезеңге өте жоғары дайындықпен келіпті. Сол себепті де қазылар алқасына жүлдегерді анықтау оңай тимеді. Қыздар сан қырлы талант иелері болып шықты. Олардың арасында әнші де, биші де, суретші де, спортшы да… бар.
Журналистика факультетінің студенті Ирина Тен ұлты кәріс болғанымен, қазақ қызынан кем емес өнер көрсетті. Биология факультетінің студенті Меруерт Донбаеваның кәнігі бишілерден еш кемдігі жоқ. Шығыстану факультетінің студенті Толқын Мырзакимованың тілге арналған өлеңі жиналған қауымға ой салды. Қыздардың ерекше қасиеттері жайлы осылай жалғастыра беруге болады.
Сонымен қорытынды сәт те келіп жетті. Қазылар алқасының ұйғарымымен бас жүлде өнерімен де, сахнадағы жүріс-тұрысымен де ерекшеленген филология факультетінің студенті Әйгерім Әшірәліге берілді. Бірқатар аруларға номинациялар бойынша дипломдар, бағалы сыйлықтар тапсырылды.
Ш.Нұрсұлтанқызы,
«Ана тілі»
