Батыстың арнайы интернет-аукцион сайтында қазақтың кілемі жоғары бағаланғандығы туралы жазылыпты.
Таза жүннен тоқылып, оюлармен өрнектелген кілемнің бір шаршы метрі 700 долларға бағаланған. Бір айта кетерлігі, бұл жаңалық біздің елге қатысты емес. Өйткені кілем Әзірбайжанда тоқылған. Сол жақтағы қазақтардың еңбегі көрінеді.
Кілемге сұраныс Парсы шығанағындағы шейхтер мен Батыс елдеріндегі ақсүйектердің назарын үнемі аударып келеді. ХV ғасырда әлемге белгілі Ганс Гольбейннің «Соңғы» атты картинасында қазақ кілемінің бейнесі көрініс табуы тегін емес. Бұл картина Лондонның көркемөнер галереясында сақтаулы. Батыстағылар үшін қазақ кілемін анықтау онша қиын емес көрінеді. Ондағы ою мен өрнектің өз-ақ ұлт ерекшелігін айғақтайды. Қазақ кілемінің отаны Әзірбайжанның Қазақ ауданы екендігіне философия ғылымдарының докторы Әлібек Қажығалиұлының «Ою мен ой» атты кітабында нақты айтылады. Ғалым қазақтың ою-өрнегін көп уақыт зерттеп, оның тарихи жақтарын анықтаған. Алтын орда патшалығы құлағаннан кейін Кавказдағы түрік тайпалары өздерін қазақпыз деп атап, Әзірбайжанның құрамында қалады. - Әзірбайжан кілемдерінің арасынан өрнектеріне қарап, қазақ кілемін бірден табуға болады. Ою-өрнекті зерттеуші ғалымдардың айтуына қарағанда, қазақ кілеміндегі өрнек алтайлық шеберлердің қолтаңбасына ұқсайды, — дейді Әлібек Қажығалиев.
Жексен САҒЫМБЕКҰЛЫ, «Айқын».
