Жамбыл облысында 3, 5 және 7 жастағы әпкелі-сіңілілер газдан уланып, өз үйлерінде қаза тапты, деп хабарлайды “Адырна” ұлттық порталы.
Әлеуметтік желілерде хабарланғандай, қайғылы оқиға 19 сәуір күні кешке Сармолдаев ауылында болған.
«Алдын ала мәлімет бойынша, таңертең анасы балаларды үйде жалғыз қалдырып, шаруаларымен кеткен. Қайтып келген кезде үйдің ішінде газдың өткір иісі сезілген. Қыздар ес-түссіз жатқан. Әйел дереу балаларды ауруханаға жеткізген, алайда, өкінішке қарай, оларды аман алып қалу мүмкін болмады — қыздар есін жимастан жансақтау бөлімінде көз жұмған», – делінген Instagram-да таралған хабарламада.
Жамбыл облыстық полиция департаментінің баспасөз қызметі бұл қайғылы жағдайды растады.
«Меркі ауданындағы тұрғын үйде үш баланың табиғи газдан улану салдарынан қаза болуына байланысты қылмыстық іс қозғалып, сотқа дейінгі тергеу басталды. Қазір оқиғаның мән-жайы анықталып жатыр, бірқатар сараптамалар тағайындалып, тергеу амалдары жүргізілуде», – деп хабарлады департамент.
