Қазақстандық сейсмологтар Атырау облысы аумағында жер сілкінісін тіркеді, деп хабарлайды “Адырна” ұлттық порталы.
Қазақстан Ұлттық деректер орталығының жедел мәліметі бойынша, жерасты дүмпулері 10 сәуір күні сағат 01:40-та (Астана уақытымен) тіркелген. Жерасты қозғалысының эпицентрі Кұлсары қаласынан оңтүстік-шығысқа қарай 120 шақырым жерде орналасқан.
Сейсмикалық дүмпудің магнитудасы — 4,3; энергетикалық класы — 9,1 болған.
Әзірге зардап шеккендер мен қираған нысандар туралы ақпарат түскен жоқ.
Айта кетейік, бұған дейін 28 наурызға қараған түні Жамбыл облысының бірнеше ауданында жер сілкінісі тіркеліп, Мерке ауылында 5 балдық, Күлан ауылында 4 балдық, ал Тараз, Шу, Қордай және Мойынқұм аудандарында 2 балдық дүмпулер байқалған еді.
Сол күні түстен кейін тағы бір жерасты қозғалысы орын алған. Еуропалық Жерорта теңізі сейсмологиялық орталығының дерегі бойынша, магнитудасы 5,0 жер сілкінісі Мерке ауылынан оңтүстік-батысқа қарай 20 шақырым жерде тіркелді.
Жамбыл облысында болған қос сілкіністің салдарынан екі ауданның 20-дан астам нысанына зақым келген болатын. Қазір өңірде сейсмикалық ахуалды бақылау және талдау жұмыстары жалғасып жатыр.
