Алматы облысы, Кеген ауданына қарасты Саты ауылында зираттарды қиратқан күдікті өз әрекетіне қатысты пікір білдірді, деп хабарлайды”Адырна” ұлттық порталы.
Әлеуметтік желілерде тараған видеода ол 2003 жылы дүниеге келгенін айтып, істеген ісін діни наным-сеніммен байланыстырады.
Ол діндегі ең ауыр күнәнің бірі – Аллаға серік қосу екенін айтып, пайғамбарлар ісінен мысал келтіруге тырысқан. Күдікті өз әрекетін де пайғамбарларға еліктеумен түсіндіреді.
Жағдайға қатысты журналист Диас Нұрақын Facebook парақшасында пікір білдірді.
“Өткенде Саты ауылындағы құлыптастарды қиратқан осы жігіт екен. Сөз саптауынан-ақ соқыр сенімге, теріс уағызға тойып алғаны байқалады. Қабірді қорладым, өлілердің әруағын мазаладым деп қаймығып тұрған жоқ. Керісінше өз ісінің дұрыстығына масаттанып отыр. Мүлде оқымаған адамға қарағанда бір ғана кітап оқыған адам қауіпті деп қалай тауып айтқан иә дана қазақ?!” - деп жазды ол.
Еске сала кетсек, бұған дейін Саты ауылында бірқатар зираттардың бұзылғаны, құлпытастардың қирағаны туралы хабар тараған болатын. Күдіктінің бұған дейін әлдебір оғаш қылықтарымен танылғаны немесе әлдебір есепте тұратыны туралы хабарланбады.
