Қазақстан аумағында сирек кездесетін металдар өндіруге мүмкіндік беретін жаңа аймақтар анықталды. Алдын ала есептеулер бойынша, 300 метр тереңдіктегі сирек жер металдарының жалпы қоры 20 миллион тоннадан асады, деп хабарлайды "Адырна" ұлттық порталы ҚР Өнеркәсіп және құрылыс министрлігіне сілтеп.
Қазіргі уақытта сирек кездесетін металл өндірісін дамыту мақсатында 12 учаскеде мемлекеттік геологиялық зерттеу жұмыстары жүргізіліп жатыр. Министрліктің хабарлауынша, бұл бағытта Cove Capital және HMS Bergbau сияқты шетелдік жеке компаниялар да барлау жұмыстарын қолға алады.
"Сирек кездесетін металдар саласын дамыту үшін 12 учаскеде зерттеу жүргізіліп жатыр. Оның ішінде Күйректікөл учаскесі ерекше маңызға ие. Бұл аймақта лантанидтерді қоса алғанда, шамамен 800 мың тонна сирек кездесетін металдар қоры бар. Алдағы уақытта бұл көлемді екі есе арттыру мүмкіндігі бар", – деді министр Қанат Шарлапаев.
Министрдің айтуынша, Қазақстан сирек жер металдарының қоры бойынша Қытай мен Бразилиядан кейінгі орынға жайғасуы мүмкін. Бұл жаңалық әлемдік БАҚ назарынан тыс қалмады. Reuters агенттігінің хабарлауынша, қазіргі уақытта Қазақстан АҚШ Геологиялық қызметі жасаған сирек жер металдары бар елдер тізіміне кірмейді. Бірақ егер министрліктің мәлімдемесі расталса, бұл жағдай өзгеруі мүмкін.
