Қарағанды облысының Қарқаралы ауданындағы Құйрықтыкөл учаскесінде сирек жер металдарының мол қоры бар перспективалы аймақтар анықталды, деп хабарлайды "Адырна" ұлттық порталы "Центргеолсемка" ЖШС-не сілтеп.
2022-2024 жылдарға арналған мемлекеттік бағдарлама аясында жүргізілген геологиялық барлау жұмыстары нәтижесінде шамамен миллион тоннаға жуық сирек жер элементтері бар бірнеше аймақ табылды. Оның ішінде ең перспективалысы ретінде Ырғыз және Дос 2 аудандары аталды. Мұнда сирек жер элементтерінің жалпы мөлшері 0,1%-дан жоғары, ал кейбір үлгілерде 0,25%-дан асып отыр.
Геологиялық зерттеулер барысында Ырғыз ауданындағы алдын ала есептелген қор шамамен 800 мың тонна сирек металдарды құрайтыны анықталды. Сонымен қатар, бұрғылау ұңғымалары кен шоғырларының түбіне жетпегендіктен, нақты қор одан да көп болуы мүмкін деген болжам жасалып отыр.
Зерттеулердің шектеулі көлеміне байланысты "Центргеолсемка" ЖШС өз қаражаты есебінен қосымша сараптамалар жүргізіп, сирек жер элементтерінің қорын алдын ала бағалауға мүмкіндік алды. Нәтижесінде Құйрықтыкөл учаскесінің барлық дерлік аумағын қамтитын жаңа перспективалы аймақ – Жаңа Қазақстан анықталды. Бұл аймақтың болжамды қоры 20 миллион тоннадан асуы мүмкін, ал сирек жер элементтерінің орташа мөлшері шамамен 700 г/т деп бағаланып отыр.
Қазақстанда сирек жер элементтерінің мұндай шоғырланған кен орындары бұрын-соңды тіркелмеген. Бұл жаңа өнеркәсіптік тип ретінде қарастырылып, елімізді сирек металдардың әлемдік қоры бойынша жетекші орынға шығару мүмкіндігіне жол ашады.
Сирек жер металдарының өндірісі жоғары технологиялық салаларды дамытуға ықпал етіп, өңірдің экономикалық өсімі мен инвестициялық тартымдылығын арттыруға септігін тигізеді. Қазіргі таңда кенді байыту технологиясын жетілдіру және бағалы компоненттерді өндіру бойынша қосымша зерттеулер жүргізілуде.
