Өзбекстан президенті Шавкат Мирзиёевтің төрағалығымен 27 наурызда өткен кеңесте елдегі атом энергетикасын дамыту мәселесі қаралды. Бұл туралы мемлекет басшысының баспасөз қызметі мәлімдеді, деп хабарлайды "Адырна" ұлттық порталы.
Жиында атом энергетикасының болашақта елдегі негізгі электр энергия көздерінің бірі болатыны атап өтілді. Сарапшылардың болжамына сәйкес, 2035 жылға қарай Өзбекстандағы электр энергиясын тұтыну 81,5 млрд кВтсағаттан 121 млрд кВтсағатқа дейін өседі. Бұл генерация көздерін әртараптандыру қажеттілігін көрсетеді.
Өзбекстан билігі 2030 жылға қарай «жасыл» энергетиканың үлесін 50%-дан асыруды жоспарлап отыр, алайда атом энергетикасын да ұзақ мерзімді шешім ретінде қарастыруда.
Кеңесте ірі атом электр станциясын (АЭС) салу мәселесі жан-жақты қарастырылып, техникалық және экономикалық аспектілер талқыланды.
Бүгінде елде шағын қуатты атом электр станциясы (АСММ) жобасы әзірленуде. Сонымен қатар, ірі АЭС салу бойынша келіссөздер жүргізіліп жатыр.
2025-2027 жылдарға арналған МАГАТЭ-мен (Халықаралық атом энергетика агенттігі) бірлескен іс-қимыл жоспары әзірленді. Жобалау мен пайдалануға беру кезеңдері МАГАТЭ тарапынан халықаралық қауіпсіздік стандарттарына сәйкес бақыланады. Қаржыландыру көздері, техникалық шешімдер және құрылыс алаңдары талқылануда.
Кеңеске дейін Өзбекстанға «Росатом» мемлекеттік корпорациясының атом энергетикасы жөніндегі бірінші вице-президенті, «Атомстройэкспорт» АҚ президенті Андрей Петров келген болатын. Ол «Узатом» агенттігінің басшысы Азим Ахмедхаджаевпен бірге шағын және ірі АЭС құрылысы бойынша келіссөздер жүргізді.
27 мамыр 2024 жылы Өзбекстан «Росатоммен» шағын атом станциясын жобалау, жабдықтау және салу жөнінде келісімшартқа қол қойды. Алғашқы шағын атом станциясы (АСММ) Джизак облысының Фариш ауданындағы Тузкан көлінің маңында салынады. Мұнда әрқайсысы 55 МВт болатын алты реактор орнатылады, жалпы қуаты 330 МВт құрайды. Құрылыс 2026 жылдың екінші тоқсанында басталады, ал алғашқы реактор 2029 жылы іске қосылады.
