Оңтүстік Кореяның үш өңірінде өршіген орман өрті салдарынан төтенше жағдай режимі енгізілді. Табиғи апаттан төрт адам қаза тауып, жүздеген тұрғын эвакуацияланды, деп хабарлайды "Адырна" ұлттық порталы.
Yonhap агенттігінің мәліметінше, 22 наурыз күні сағат 18:00-де төтенше жағдай Ульсан қаласы, Кёнсан-Пукто және Кёнсан-Намдо провинцияларында жарияланған.
"Өрттен төрт өрт сөндіруші көз жұмды. Тағы алты адам, соның ішінде бір жергілікті тұрғын зардап шекті. 500-ге жуық адам жақын маңдағы ауылдардан эвакуацияланды. 260 адам баспанасынан айырылып, уақытша орналастыру орталықтарына көшірілді", – деп хабарлайды агенттік.
Өрт 21 наурыз күні Санчхон уезінде басталған. Сенбі таңында оның 70%-ы сөндірілгенімен, қатты жел салдарынан бұл көрсеткіш қайта 35%-ға дейін төмендеді.
Табиғи апат орын алған аудандарда теміржол қатынасы уақытша тоқтатылып, жоғары жылдамдықтағы тас жолдар жабылды.
