Ыстамбұл прокуратурасы жемқорлық пен лаңкестік ұйымдармен байланыс ісі бойынша 61 адамның қамауға алынуын талап етті, деп хабарлайды "Адырна" ұлттық порталы.
Түркиялық Halk TV арнасының мәліметінше, 23 наурыз күні Астана уақытымен 07:35-те сот Имамоглуды тергеуді бастаған. Сот отырысына Имамоглудың жұбайы, ұлы және Түркиядағы негізгі оппозициялық күш – Халық-республикалық партиясының жетекшісі Өзгүр Өзел де қатысты.
Бұған дейін ол өзіне тағылған барлық айыптарды жоққа шығарған болатын. Прокуратура оның қамауға алынуын талап етті.
Ыстамбұлдың қылмыстық соты прокуратураның Экрем Имамоглуны тергеу аяқталғанға дейін қамауда ұстау туралы өтінішін қанағаттандырды. Оны қамауға алу шешімін қабылдады. Ол жақын арада түрмеге жеткізіледі.
Имамоглуға екі іс бойынша айып тағылған. Біріншісі – мэриядағы жемқорлыққа, екіншісі – терроризмді қаржыландыруға қатысты. Дегенмен, қазіргі таңда ол жемқорлық ісі бойынша қамауға алынған.
Онымен бірге бірқатар жоғары лауазымды шенеуніктер, оның ішінде мэрдің кеңесшісі Мұрат Онгун және Стамбұлдың Шишли ауданының басшысы Эмрах Шахан да қамауға алынды. Ал кейбір күдіктілер сот бақылауымен немесе елден кетпеу туралы қолхатпен босатылды.
Жалпы алғанда, жемқорлық және терроризм істері бойынша 92 адам тергелуде.
