Биыл Қазақстанның халық жазушысы, драматург Қуандық Шаңғытбаевтың туғанына 100 жыл толып отыр, деп хабарлайды «Адырна» тілшісі.
Көрнекті тұлға 1925 жылдың 21 наурызында Ақтөбе облысының Қарабұтақ ауданында дүниеге келген. Қазақ мемлекеттік университетін (қазіргі ҚазҰУ — ред.) бітірген.
1944–1955 жылдары Ақтөбе педагогикалық институтында кафедра меңгерушісі, облыстық «Социалистік жол», «Актюбинская правда» газеттерінде бөлім меңгерушісі, 1955–1973 жылдары «Қазақ әдебиеті» газетінде, «Жұлдыз» журналында бас редактордың орынбасары, бас редактор, «Қазақфильм» киностудиясында, Қазақ радиосында бас редактор қызметтерін атқарған.
Алғашқы кітабы «Ар» деген атпен 1945 жылы жарық көрді. Кейін «Өлеңдер», «Аққу әні», «Стихи», «Арма, республикам», «Лирика», «Жыр жаһаны», «Гүлтолқын», «Саршатамыз» «Жыл құсы», «Махаббат пен ғадауат» лирикалық кітаптары оқырмандарға ұсынылды.
Қуандық Шаңғытбаев — көптеген ән өлеңінің авторы. А. С. Пушкиннің «Евгений Онегин» романын (1949, 1986), М.Ю.Лермонтов, И.В.Гете, Р.Бернс лирикаларын, О.Хаямның рубаяттарын, М.Горькийдің «Қыз бен ажал» поэмасын (1941) қазақ тіліне аударды. Ол аудармашылық қызметі үшін Халықаралық Пушкин сыйлығына ие болды.
