Наурыз мерекесін тойлау аясында Көкшетауда ұлттық киімдер күніне арналған облыстық «Сән мен салтанат» фестивалі өтті. Бұл шара қазақ халқының мәдени мұрасын сақтау, дәріптеу және ұлттық киімнің әсемдігін көрсету мақсатында ұйымдастырылды, деп хабарлайды Өңірлік коммуникациялар қызметінен.
Фестивальге Ақмола облысының әр ауданынан дизайнерлер қатысып, өз жұмыстарын ұсынды. Шара аясында ұлттық киім үлгілері таныстырылып, олардың тарихы мен символикалық маңызы жайлы айтылды.
Фестивальге қатысқан шеберлердің айтуынша, ұлттық киім – жай ғана сән емес, ол халқымыздың тарихы, мәдениеті мен рухани болмысының айнасы. Ұлттық киімдерді тігу үлкен шығармашылық пен табандылықты талап етеді.
«Біз көп жылдан бері ұлттық киімдерді тігіп, халыққа ұсынып келеміз. Бұл сала терең білім мен үлкен шеберлікті қажет етеді. Әр көйлек қазақ қызының нәзіктігін, ерекшелігін көрсететіндей етіп жасалады», – дейді Көкшетау қаласындағы «Светлана» ательесінің директоры Светлана Ехлакова.
Дизайнер Әсемгүл Оспанованың айтуынша, бүгінде ұлттық киімдер тек мерекелерде ғана емес, күнделікті өмірде де сәнге айналып келеді.
«Біздің топтамаға дәстүрлі үлгілермен қатар, заманауи сәнге сай киімдер де енгізілген. Ұлттық киімді дәріптеу тек сән үрдісі ғана емес, бұл – ұлттың рухани бірлігін нығайтуға, түп-тамырымызға деген мақтаныш сезімін арттыруға бағытталған құндылық. Қазақстан Президенті Қасым-Жомарт Тоқаев Ұлттық құрылтайда ұлттық киім киюдің сәнге айналуы керектігін атап өткен болатын», – дейді ол.
Фестиваль соңында барлық дизайнерлерге алғыс хаттар мен арнайы сыйлықтар табысталды. Бұл шара ұлттық мұраны сақтау мен оны болашақ ұрпаққа жеткізудің маңыздылығын тағы бір мәрте айқындай түсті деседі ұйымдастырушылар.
