Тәжікстан президенті Эмомали Рахмон 13 наурызда мемлекеттік сапармен Қырғызстанға келді. Бұл туралы Қырғызстан президентінің баспасөз қызметі мәлімдеді, деп хабарлайды "Адырна" ұлттық порталы.
Тәжікстан көшбасшысын Бішкектегі «Манас» халықаралық әуежайында Қырғызстан президенті Садыр Жапаров қарсы алды.
«Ұлттық киімдегі қыздар Эмомали Рахмонды гүл шоқтарымен қарсы алды. Мемлекет басшыларына қырғыз және тәжік өнерпаздары орындаған музыкалық шығармалар ұсынылған концерттік бағдарлама көрсетілді», – делінген ресми хабарламада.
Мемлекеттік сапар аясында екі ел басшылары екіжақты ынтымақтастықты дамыту және маңызды мәселелерді талқылайды. Сондай-ақ бірнеше екіжақты келісімдерге қол қойылады деп жоспарланған.
Қырғызстан президенті әкімшілігінің сыртқы саясат бөлімінің жетекшісінің мәлімдеуінше, Эмомали Рахмонның сапары барысында Қырғызстан мен Тәжікстан арасындағы мемлекеттік шекара туралы келісімге қол қойылады.
Айта кетейік, 21 ақпанда Бішкекте өткен Қырғызстан мен Тәжікстан үкіметтік делегацияларының бірлескен отырысында шекара мәселесі бойынша түпкілікті хаттамаға қол қойылған болатын.
