Алматы әуежайында пышақпен әуежай қызметкерін кепілге алып, рюкзагында "бомба" бар деп жолаушыларды қорқытқан ер адамға қатысты үш қылмыстық іс қозғалды, деп хабарлайды "Адырна" ұлттық порталы Polisia.kz-ке сілтеме жасап.
Оқиға бойынша "Кепілге алу", "Қару қолдану арқылы бұзақылық жасау" және "Терроризм актісі туралы жалған хабарлама тарату" баптарымен қылмыстық іс қозғалған.
Сот шешімімен күдікті екі айға қамауға алынды.
ІІМ басшысы Ержан Саденовтың тапсырмасымен елдегі әуежайлар мен вокзалдардағы қауіпсіздік жүйесі қайта тексерілуде.
Арнайы топ осал тұстарды анықтап, бақылауды күшейту, жедел әрекет ету алгоритмін жетілдіру және қауіпсіздік қызметкерлерін оқыту бойынша шаралар қабылдауда.
Ведомство бұл жағдайдың толық бақылауда екенін және болашақта осындай оқиғалардың алдын алу үшін қажетті жұмыстар жүргізілетінін мәлімдеді.
